Thottal Thodarum

Mar 23, 2019

சாப்பாட்டுக்கடை - குப்பம்மாள் மெஸ்


சில மாதங்களுக்கு முன் நண்பர் தீபக் எனக்கு போன் செய்து என் நண்பர் பாண்டிச்சேரி ஹவுஸ் பக்கத்தில ஒரு மெஸ் ஆரம்பிச்சிருக்காரு ஒரு நடை போய் பார்த்துட்டு வந்து சொல்லுங்க என்றார். அந்த வாரத்திலேயே ஒரு நாள் போய் நின்றேன். நண்பர் தீபக் சொன்னதை சொன்னேன். “சார். இன்னைக்கு வேண்டாம். ஏன்னா புதுசா மாஸ்டர் வந்திருக்காரு. ஆளு இன்னும் செட்டாகலை. ஒரு வாரம் போகட்டும் எல்லாம் செட்டானதும் சொல்லுறேன்’ என்றார்.

அதற்கப்புறம் மறந்தே போனேன். சென்ற வாரம் ஒரு நாள், அந்த பக்கம் க்ராஸ் செய்யும் போது நல்ல பசி. ஒரு நடை எட்டிப் பார்க்கலாம் என்று போய் சாப்பிட உட்கார்தேன். மெஸ் என்றாலே மதிய சாப்பாடுதான் ஸ்பெஷலாய் இருக்கும் என்பதால் ஒரு மீல்ஸ் கொடுங்க என்றதும் நியாபகம் வைத்துக் கொண்டு என்னை கேட்டார். ஆமாம் என்றேன். சார். நம்ம அயிட்டத்துல கறி சோறு மதியத்துல ரொம்ப பேமஸ் அதை ட்ரை பண்ணுங்க என்றார்

சுடச்சுட கறிச் சோறு வந்தது. நன்கு வெந்த மட்டன் பீஸுகளோடு, நல்ல பெப்பர் மணத்துடன். வாயில் வைத்தவுடன் பெப்பர் மற்றும் உறுத்தும் காரத்துடனான கலந்த மட்டன் சோறு. மூக்கு பக்கம் எடுத்து வைக்கும் போதே மணத்துடன். அத்துடன் ரெண்டு துண்டு மீன் வறுவல் சாப்பிட்டேன். வறுவலுடன் வரும் மசாலா தூள்களை சோற்றுடன் சேர்த்து சாப்பிடும் போது வெகு சுவையாய் இருந்தது. மீல்ஸுக்கு கருவாட்டுக் குழம்பு, கொடுப்பதாய் சொன்னார்கள். இரவு நேரங்களில் மட்டன் தோசை மிகப் பிரபலமாம். ஒரு நடை போய் சாப்பிட்டு விட்டு எழுதுகிறேன். கறிச்சோறு டிவைன்.


குப்பம்மாள் மெஸ்
பாண்டிச்சேரி கெஸ்ட் அவுஸ் அருகில்
முனுசாமி சாலை
கே.கே.நகர்
9514499888

Mar 21, 2019

2018 ஆம் ஆண்டின் வெப் சீரீஸ்கள் -2

Sacred Games
இந்திய அளவில் பெரும் விளம்பரத்தோடு வெளியான நெட்ப்ளிக்ஸ் சீரீஸ்.  அனுராக் காஷ்யப், விக்ரமாதித்ய மோத்வானி, நவாசுதீன் சித்திக், சாயிப் அலிகான், ராதிகா ஆப்தே என பிரபலங்களை களமிறக்கியிருந்தார்கள். வழக்கமான சாதாரணன் தாதாவான கதை தான் என்றாலும் அதை ப்ரசெண்ட் செய்த விதத்தில் “வாவ்” போட வைத்துவிட்டார்கள். மிரட்டும் நடிப்பு. அதிரடி வசனங்கள். காட்சிகள். பார்வையாளர்களை ஒரே வீச்சில் பார்க்க வைக்கும் திரைக்கதை என மட்டுமில்லாம டெக்னிக்கலாய் அசத்தியிருந்தார்கள். இந்திய அளவில் வந்த நல்ல வெப் சீரிஸ் இது.  அமேசானின் வழியில் நெட்ப்ளிக்ஸும் தமிழ் மற்றும் இந்திய மொழிகளில் டப்பிங் செய்ய ஆரம்பித்திருக்கிறார்கள். விரைவில் இரண்டாம் சீசன் களைக் கட்ட போகிறதாம். ஐயம் வெயிட்டிங்.

Mirzapur
நீ வயலண்டாய் சாக்ரட் கேம்ஸை இறக்குகிறாயா? இதோ என் பங்கிற்கு என அதே போல வயலண்ட் ஆக்‌ஷன் சீரிஸை அமேசான் இறக்கிவிட்டிருக்கிறது. சென்ற வருடம் தரமான சம்பவம் செய்த,  அதே இன்சைட் எட்ஜ் தயாரிப்பு நிறுவனத்திடமிருந்து வெளியாகியிருக்கிறது. மிர்சாப்பூர் என்ற் அஒரு நகரத்தை ஆண்டு கொண்டிருக்கிற அகானந்த்  திரிபாதி எனும் கார்பெட் வியாபாரி. பேருக்குத்தான் கார்பெட் வியாபாரமே தவிர நாட்டுத் துப்பாக்கியும், அதன் பின்னணியில் உள்ள கேங்க் வாரும், வழக்கம் போல தன் பொருப்பை உணராத தறுதலைப் பிள்ளையினால் ஏற்படும் ப்ரச்சனைத்தான்  தான் கதைக் களம். அப்பிள்ளையின் பொறுப்பற்ற செயலினால் ஒரு கொலை நிகழ்ந்துவிட, அதை எதிர்த்து கேஸ் போடக் கூட ஆளில்லாத நேரத்தில் ராம்காந்த் பண்டிட் எனும் நேர்மையான வக்கில் அதில் இறங்க, அவரது மகன்களான குட்டூ, பப்புவை திரிபாதி எப்படி அவர்களை தங்கள் வலைக்குள் விழுங்குகிறான். அதிகாரத்தை ருசித்தவர்களின் கடைசி நிலைபாடு என்ன? என விறுவிறுப்புக்கு பஞ்சமில்லாத கண்டெண்ட். பட் ரொம்பவே அடித்து துவைக்கப்பட்ட கதைக்களன். கேரக்டர்கள். தரமான மேக்கிங் மற்றும் சில நடிகர்களின் சிறப்பான நடிப்பு சீரீஸை காப்பாற்றியுள்ளது. க்ளைமேக்ஸை Fauda எனும் இஸ்ரேலிய சீரீஸுலிருந்து சுட்டது கொஞ்சம் உறுத்தலே.
GHOUL
நெட்ப்ளிக்ஸ் மற்றும் அனுராக், மோத்வானியின் ஆஸ்தான நாயகியான ராதிகா ஆப்தேவின் நடிப்பில் வெளியான அமானுஷ்ய மினி  வெப் சீரீஸ். எதிர்காலத்தில் கிட்டத்தட்ட எதேச்சிய அதிகாரக் கட்டுப்பாட்டில் இந்தியா வந்துவிட, அரசுக்கு எதிராய் யார் எதை செய்தாலும் அவர்களை தனிமைப்படுத்தி, கடும் தண்டனைக்கு உள்ளாக்கி கிட்டத்தட்ட காணாமல் போக்கடிக்கும் ஒர் ஜெயில். தன் தந்தையையே அரசுக்கு எதிராய் எழுதினதாய் கருதி அங்கே பிடித்துக் கொடுக்கும் மகள். அரசு போலீஸ் அதிகாரி வேறு. அந்த ஜெயிலுக்கு போன பிறகு தான் அங்கே நடக்கும் அநியாயங்கள் புரிய ஆரம்பிக்கிறது. அங்கே சில அமானுஷ்யங்கள் நடைபெற ஆரம்பிக்கிறது. மெல்ல அந்த அமானுஷ்யம் அந்த இடத்தை ஆக்கிரமிக்க ஆரம்பித்து இருக்கிற எல்லாரையும் அழிக்கிறது.  சில இடங்களில் முதுகு தண்டு சில்லிட்டது உண்மை. ஆரம்ப எபிசோடில் கொஞ்சம் ஸ்லோவாய் ஏதோ தீவிர அரசியல் படம் போல தோன்றினாலும் முதல் எபிசோட் முடிவிலிருந்து மொத்தமும் அமானுஷ்ய சீரிஸாய் மாறி நம்மை கட்டிப் போடுகிறது. அதீதமாய் ரத்தம், சதை, பயம் அனைத்தையும் சிதற விட்ட சீரீஸ்.

Little Things
இதன் முதல் சீசன் யூட்யூபில் பெரும் வரவேற்ப்பை பெற்றது. இப்போது இரண்டாவது சீசன் நெட்ப்ளிக்ஸில். கம்போஸ்ட் துருவும். துள்ளலான மித்தாலியும் மட்டுமே இந்த சீரீஸின் ப்ளஸ் அண்ட் மைனஸ். லிவினில் இருக்கும் இந்த ஜோடிகளுக்கு இடையே நடைபெறும் சுவாரஸ்ய சம்பவங்கள். அது ஏற்படுத்தும் ப்ரச்சனைகளை இவர்கள் எப்படி தாண்டிப் போகிறார்கள் என்பது தான் கதை களம். அழகான ஜோடி. அதுவும் மித்தாலியை திரையில் பார்க்க அவ்வளவு அழகு. நம் பக்கத்து வீட்டு பெண் போல அவ்வளவு இயல்பான நடிப்பு. இருவருக்கிடையே ஏற்படும் சம்பவங்கள் திணிக்கப்படாமல் மிக வாழ்க்கையை ஒட்டி இருப்பது சுவாரஸ்யம். குறிப்பாய் மித்தாலியின் அம்மா வீட்டிற்கு வர, அவரை கோயில், குளம் என்ரு சுற்றிக் காட்டு என துருவிடம் சொல்லிவிட்டு, மித்தாலி அலுவலகம் போய்விடுகிறாள். ஆனால் மித்தாலியின் தாயோ, அமீர்கான், ஷாருக்கான் வீட்டை பார்க்க வேண்டும் என்று விரும்புகிறாள். துருவும் அவளை அங்கே அழைத்து செல்கிறான். தன் நெடுநாள் தோழியை சந்திக்க செல்கிறாள். அவர்கள் மனம் விட்டு பேசுகிறார்கள். பேச்சினிடையே ஒரு பாவ் பாஜி கடை பற்றி பேச்சு வருகிறது. அவர்களுடய எல்லா முதல் அனுபவங்களும் அங்கே தான் ஆரம்பித்தது என்று சொல்லி, முதல் முத்தம் உள்பட என்று தோழி கண்ணடித்து சொல்ல, துருவுக்கும், மித்தாலியின் அம்மாவுக்குமிடையே ஏற்படும் புரிதல். செம்ம க்யூட்.  இயல்பான வசனங்கள். முந்தைய சீசனை விட தரமான ஒளி மற்றும் ஒலிப்பதிவு என எல்லாவற்றிலும் நல்ல தரம். ஒரு ஃபீல் குட் வெப் சீரீஸ் பார்க்க விரும்புகிறவர்களுக்கு ஐ ரெக்கமெண்ட்.

Tikli And Lakshmi Bomb

நெட்ப்ளிக்ஸின் நேரடி ஹிந்தி திரைப்படம்.  பெர்லின் பெஸ்டிவலில் சிறந்த இண்டிபெண்டட் திரைப்பட விருதை பெற்ற படம்.  நிஜமாகவே கொஞ்சம் போல்டான கதை தான். மும்பைத் தெருக்களில் நின்றபடி விபச்சாரம் செய்து கொண்டிருக்கும் பெண்கள். அவர்களின் பிரச்சனைகள். போலீஸ். விபச்சாரத் தரகன். அவனின் பின்னால் இருக்கும் அரசியல் என பலவற்றை பேசும் படம். புதியதாய் அந்த ஏரியாவில் விபச்சாரம் செய்ய வரும் பெண் நாம் ஏன் எந்த வேலையும் செய்யாத தரகர் நாய்க்கு காசு கொடுக்கணும் என்று போர்கொடி எழுப்பி, கூட்டம் சேர்ந்து தரகனை ஒழிக்க முயலும் கதைதான் இந்த டிக்லி அண்ட் லஷ்மி கேங்க்.  விபச்சாரத்தில் கம்யூனிசம், தனி மனித உரிமை, பின்னணியில் உள்ள அரசியல், உழைப்பு சுரண்டல்கள், அனைவரையும் ஒருங்கிணைத்து வெற்றிகரமாக செயல்பட்டதை மிகச் சுலபமாய் மூட்டைப் பூச்சியை நசுக்குவதைப் போல  நசுக்க முயலும் முயற்சி, என மிக இயல்பான நடிப்பு. தைரியமான வசனங்கள். மிகைப்படுத்தப்படாத படமாக்கல் என சுவாரஸ்யத்துக்கு பஞ்சமில்லாத ஒர் இணையப் படம்.  இம்மாதிரியான படங்களுக்கு சரியான இடம் இந்த ஓ.டி.டி. ப்ளாட்பார்ம்கள்.


Mar 19, 2019

2018 ஆம் ஆண்டின் வெப் சீரீஸ்கள் மற்றும் வெப் படங்கள் – ஒரு பார்வை-1


ஓ.டி.டி ப்ளாட்பார்ம்களின் வருகை தமிழ் சினிமாவுக்கு மட்டுமல்ல, இந்திய சினிமாவுக்கே ஒர் புத்துணர்ச்சியை அளித்திருக்கிறது என்றே சொல்ல வேண்டும். இண்டர்நெட்டின் வளர்ச்சியால் கொஞ்சம் கொஞ்சமாய் தேய்ந்து போய்க் கொண்டிருக்கும் சாட்டிலைட் சேனல் உரிமை வியாபாரம் மிகப் பெரிய கேள்விக் குறியாய் இருக்கும் நேரத்தில், ஸ்ட்ரீமிங் உரிமை எனும் இண்டர்நெட் ஒளிபரப்பு உரிமை கொஞ்சம் ஆசுவாசத்தை கொடுத்திருக்கிறது.

படங்களுக்கு புத்துணர்ச்சியை அளித்தது போலவே,  வெப் சீரீஸ்கள் எனும் புதிய கதவு திறந்திருக்கிறது. வழக்கம் போல இந்தி பெரிய மார்கெட் என்பதால் அனுராக் காஷ்யப், விக்ரம் மோத்வானி, போன்ற பெரும் தலைகள் எல்லாம் சடுதியில் அதன் சூட்சுமத்தைப் பிடித்து பெரும் வெற்றி பெற ஆரம்பித்திருக்கிறார்கள்.  மற்ற மொழிகளில் வழக்கம் போல பட்ஜெட் மற்றும் வெப் சீரீஸ்களைப் பற்றிய கண்டெண்ட் அறியாமைகளோடு, களம் இறங்கியிருக்கிறார்கள்.

இதில் பெரும் கை நெட்ப்ளிக்ஸ் என்றாலும், இந்திய அளவில் பெரும் முதலாளி அமேசான் ப்ரைம் தான். இவர்களுடன் பாலாஜி டெலி பிலிம்ஸின் ஆல்ட் பாலாஜி, ஸ்டாரின் ஹாட் ஸ்டார், கலர்ஸின் வூட், சன் நெட்வொர்க்கின் சன் நெக்ஸ்ட், வியூ, டைம்ஸின் எம்.எக்ஸ் ப்ளேயர், ஜீ டிவியின்  ஜீ5, என வரிசைக் கட்டி ஆரம்பித்திருக்கிறார்கள். இவர்கள் இல்லாமல் ஜியோ, ஏர்டெல், போன்றோர் மொத்த ஓ.டி.டி ப்ளாட்பார்மகளில் வரும் நிகழ்ச்சிகளை ஒன்றிணைத்து தரும் முயற்சிகளும் நடந்து கொண்டிருக்கிறது. இன்னும் சில வருடங்களில் இவர்கள் அனைவருக்கும் புதிய நிகழ்ச்சிகள் தேவை. இல்லாவிட்டால் தாக்குப்பிடிக்க முடியாது என்பதால் வரும் காலங்களில் நல்ல தரமான வெப் சீரீஸ் கண்டெண்டுகள் கிடைக்கப் பெறும் வாய்ப்புகள் அதிகம்.

ஆனால் இவ்வாண்டின் முக்கிய முயற்சியாய் நெட்ப்ளிக்ஸ் தன் Black Mirror சீரீஸின் ஒர் எபிசோடாய் “Bandersnatch” எனும் புதிய எபிசோடில் எடுத்திருக்கும் முயற்சி மிக முக்கியமானது.  பார்வையாளர்களின் விருப்பத்திற்கு ஏற்ப இண்டராக்டிவாய் காட்சிகள் அமைத்து வெளியிட்டிருப்பது பெரும் பரபரப்பை ஏற்படுத்தியிருக்கிறது. உதாரணமாய் காட்சியில் நாயகனின் தந்தை இரண்டு உணவை தன் கையில் வைத்திருக்கிறார்.  காட்சியில் நாயகன் எதை சாப்பிட வேண்டும் என்று நீங்கள் முடிவு எடுக்கிறீர்களோ அதை நாயகன் சாப்பிடுவதாய் காட்சி வரும். அது போல க்ளைமேக்ஸை கூட நீங்கள் மாற்றலாம். இது போல வீடியோ கேம்களில் வந்திருக்கிறது. ஸ்டீமிங்கில் இது புதுசு. அவன் காட்டுறதை நான் ஏன் பார்க்கணும் வேற மாதிரி புதுசா நானே இதை வடிவமைச்சுக்கிறேன் என்கிறார்ப் போல எதிர்காலத்தில் வந்துவிடும் போல.

தற்போதைய நிலையில் கார்பரேட் முதலாளிகள் நடத்தும் இந்நிறுவனங்கள் தங்கள் வழக்கம் போல, ஏற்கனவே டிவி சீரீஸ் காலத்திலிருந்து மாவரைத்துக் கொண்டிருக்கும் நிறுவனங்களோடு மட்டுமே இணைந்து தயாரிப்பில் ஈடுபடுகிற காரணத்தினால் பழைய சீரியல் மாவையே கொஞ்சம் புது மொந்தையில் தருகிறார்கள். அது மட்டுமில்லாமல் முழுக்க முழுக்க நிறுவனங்களின் பணம் என்பதால், எத்தனை சுருக்கி எடுத்து பெரிய லாபம் சம்பாதிப்பது என்ற கணக்கு முக்கியமாய் கருதப்படுவதால் தரம் நடுத்தரமாய்க் கூட இல்லை என்றே சொல்ல வேண்டும்.

ஆனால் படங்களைப் பொறுத்தவரை அப்படி சொல்ல முடியாது. பெரும்பாலும் வெப் ரீலீஸுக்கு மட்டுமேயான படங்கள் ஏற்கனவே தயாரிக்கப்பட்டு அதிலிருந்து இவர்கள் தெரிந்தெடுப்பதால் கொஞ்சம் பரவாயில்லை ரகமாய் அமைந்துவிடுகிறது. பெரும்பாலும் செக்ஸ் சம்பந்தப்பட்ட படங்கள். ஃபீல் குட் ரொமாண்டிக் மற்றும் குடும்பப் படங்கள் தான் அதிகம். காரணம் இவற்றுக்கு வெளியே வெள்ளித்திரைகளில் பெரும் வரவேற்ப்பை பெறுவது ரொம்பவே கஷ்டமான காரியமாய் இருப்பது ஒரு முக்கிய காரணம்.

இதையெல்லாம் மீறி இந்திய அளவில், தமிழிலும் மற்ற மொழிகளிலும் வந்த சீரிய வெப் சீரீஸ்  மற்றும் வெப் படங்களின் முயற்சிகளைப் பற்றிய கட்டுரைத் தொடர் தான் இது.
Breathe
அமேசான் தன் இந்திய மார்கெட்டை சென்ற வருடம் வெளியிட்ட “இன்சைட் எட்ஜ்” எனும் சீரீஸுடன் ஆரம்பித்திருந்தது. பெரும் வெற்றி. அவர்களது மிகப் பெரிய பட்ஜெட் மற்றும் இந்திய முக்கிய ப்ராந்திய மொழிகளில் டப் செய்யப்பட்டது இன்னும் பல பேரை சென்றடைந்து பல இண்டர்நேஷனல் விருதுக்கு பரிந்துரைக்கப்பட்டது.  அது போல இந்த வருடம் மிக பெரிய விளம்பரங்களுடம் இந்தியாவெங்கும் மாதவன் நடிப்பில் வெளியானது இந்த வெப் சீரீஸ்.

தன் மகனின் லங் கேன்சருக்காக மாற்று உறுப்பு அறுவை சிகிச்சைக்காக காத்திருக்கிறார் மாதவன். ஆனால் பையன் அது வரை தாக்கு பிடிப்பது கஷ்டம் என்று தெரிய வர, உறுப்பு தானம் கொடுக்க லிஸ்டில் இருப்பவர்களை எல்லாம் கொல்கிறார். பின்பு என்ன ஆனது என்பதுதான் கதை. ஆரம்பக் காட்சிகள் சில சுவாரஸ்யங்கள் இருந்தாலும், லாஜிக்கலாய் உடல் உறுப்பு தானம் கொடுக்க பதிவு செய்திருக்கிறவர்களை தன் சுயநலத்துக்காக கொல்வது என்பது ஏற்றுக் கொள்ள முடியாத விஷயமாய் போனதால் மாதவனின் அருமையான நடிப்பு விழலுக்கு இறைத்தானதாய் போனது. என்ன இதனால் பயன் அடைந்தவர்கள் அமேசான். அதீத விளம்பரம் காரணமாய் நிறைய பேர் உறுப்பினர் ஆனார்கள் என்கிறார்கள்.


இந்த சீரீஸின் தோல்விக்கு காரணம் புகழ் பெற்ற  “ப்ரேக்கிங் பேட்” எனும் அமெரிக்க சீரியலை அப்படியே உட்டாலக்கடி அடித்ததினால். அதில் நாயகனுக்கு லங் கேன்சர் வந்துவிட, தான் சாவதற்குள் தன் குடும்பத்தைக் காப்பாற்ற உடனடி பணம் தேவை. எனவே போதைப் பொருள் தயாரித்து விற்பனை செய்ய ஆரம்பிப்பான். அது அவனை எப்படி புதைகுழியில் கொண்டு போய் சேர்க்கிறது என்பதுதான் கதை. அதில் இருக்கும் அடிப்படை எமோஷன் கூட புரியாமல் மாற்றியமைத்ததுதான் தோல்விக்கு காரணம்.

Mar 16, 2019

கதை திருட்டு

கதை திருட்டு
இணையமெங்கும் தற்போதைய பரபரப்பு சர்கார் படக்கதை திருட்டு விஷயம் தான். பாருங்கள் நான்கூட  இக்கட்டுரையை ஆரம்பிக்க கதை திருட்டு என்று சொல்லித்தான் ஆரம்பிக்க வேண்டிருக்கிறது. ட்ரெண்டிங் முக்கியம்  என்னடா இது ஆரம்பித்த பத்தியிலேயே முருகதாஸுக்கு சப்போர்ட் செய்கிறார் போல இருக்கிறதே என்று யோசித்தீர்களானால் நிச்சயம் இல்லை. இக்கட்டுரை யாருக்கும் ஆதரவாக எழுதப்பட்ட கட்டுரையல்ல.

உலகம் உருவாக ஆரம்பித்ததிலிருந்து கதை இருக்கிறது. மனிதன் வாய் வழியாய் சொல்லப்பட்டது. மொழி, கலை வடிவத்திற்கு ஏற்ப அதனதன் வடிவில் மறு வடிவம் பெற்றுக் கொண்டேயிருக்கிறது. அந்த மாறுதலே சாஸ்வதம். என்பதை புரிந்தவர்கள் பெரிதாய் அலட்டிக் கொள்வதில்லை. அப்படியென்றால் தெரிந்தே கதையை திருடியவர்களை கேட்பது நியாயமில்லையா என்றால் நிச்சயம் கேட்கப்பட வேண்டிய, உரிமையை கோர வேண்டிய நியாயம் தான்.

சில வருடங்களுக்கு முன் பிரபல தயாரிப்பு நிறுவனத்தின் தயாரிப்பாளர் தன்னுடய நிறுவன சுயசரிதையை ஒர் தினசரியில் எழுதினார். எப்போது படங்கள் தயாரித்தார்கள். எங்கிருந்து படங்களின் கதை எடுக்கபட்டது போன்ற பல தகவல்கள் அதில் இருந்தது. ஏன் பிரபல கதாசிரியர்  எழுதிய கட்டுரைத் தொடரிலும் அதே விதமான வாக்குமூலம் தான். பட் படித்தவர்களுக்கு அது வாக்குமூலமாய் தெரியவில்லை. காரணம் அதை வைத்து இப்போது லைவ்வாய் ஏதும் செய்ய முடியாது. கோர முடியாது. இவர்களுக்கு இன்ஸ்பிரேஷனான படங்களின் கதாசிரியர்களுக்கோ, தயாரிப்பு நிறுவனங்களுக்கோ  தமிழ் தெரிந்திருந்தால் இன்றைக்கும் கேஸ் போட நிறைய வாய்ப்பு இருக்கிறது. அப்படியான ஓப்பன் கன்பஷன்.

கதை காப்பி என்றால் எப்படி? ஒரு ஊருல ஒரு ராஜா.. ஒரு ராணி.. அவருக்கு ஒரே ஒரு பெண். அவள் ஏழை விவசாயியை காதலிக்கிறாள். வேற கதை ஒரு ராஜா, ராணி, அவருக்கு ரெண்டு பெண். அதில் ஓருத்தி ஏழை விவசாயியை காதலிக்கிறாள். இது வேறு கதையா இல்லை ஒரே கதையா? அடிப்படையாய் சொல்லப்படுகிற லைன் ஒன்றுதான் பட்.. அதை திரைக்கதையாக்கிய விதம் தான் வேறு வேறாய் இருக்கும்.

காதல் கதைகள் என்று சொல்ல போனால், 1. காதலர்களுக்கு வெளியிலிருந்து பிரச்சனை 2. காதலர்களுக்கு வீட்டிலிருந்தே பிரச்சனை. 3. காதலர்களுக்குள்ளேயே பிரச்சனை. இந்த மூன்று லைனுக்குள் தான், ஜாதி, மதம், சமூக ஏற்றத்தாழ்வு, மனப் பிரச்சனைகள் என பல  உபகதைகள். காதல் படம் ரிலீஸான போது அது வேறொரு இயக்குனர் சொன்ன கதையை பாலாஜி சக்திவேல் எடுத்துவிட்டார் என்ற குற்றச்சாட்டு எழுந்தது. மராத்தியில் நாகராஜ் மஞ்சுளே சாய்ராட் என்று எடுத்த கதையைப் பார்க்கும் போது அது காதல் படம் போலவே நமக்கு இருந்தது. மற்ற மற்றவர்களுக்கு இல்லை. பட்.. உயர்ஜாதி பெண்ணுக்கும், கீழ் ஜாதி பையனுக்குமிடையே காதல், ஓடிவந்து திருமணம் செய்து கொள்கிறார்கள். காதலில் பெண் பிரிக்கப்பட்டு, பையன் பைத்தியமாய் அலைகிறான். இங்கே இருவரும் கொல்லப்படுகிறார்கள். இதைத் தவிர வேறு வித்யாசம் பெரிதாய் இல்லை. வீட்டை விட்டு ஓடி வந்து ஸ்லம்களில் கஷ்டப்படும் காட்சிகள் அவரவர் ஜியாகிரபிக்கலுக்கு ஏற்ப மாறியிருந்ததே தவிர, ஆல்மோஸ்ட் ஒன்றே. ஆனால் யாரும் என் கதை என்று கோரவில்லை.

மெளனராகத்தை மணிரத்னம் மகேந்திரனிடம் போட்டுக் காட்டிய போது, இது உங்கள் நெஞ்சத்தை கிள்ளாதே படத்திலிருந்து இன்ஸ்பயர் ஆனது என்றாராம். மகேந்திரன் அதை மறுத்தாலும் நம்மால் அக்கதையில் உள்ள ஒற்றுமைகளை காண முடியும். ஆனால் அதே மெளன ராகத்தை, ராஜா ராணியாக்கி பார்க்கும் போது குறைந்த பட்சம் பதினெட்டு விஷயங்கள் ஒற்றிருந்தாலும், அதை ஒத்துக் கொள்ள அந்த இயக்குனர் தயாராக இல்லை. என்பது வருத்தத்துக்குரிய விஷயமே.

சமீபத்தில் ஒரு கதை விவாதத்திற்காக ஹைதராபாத் சென்றிருந்தேன். அங்கே இருக்கும் அத்தனை பெரிய ஹீரோக்களுக்கும் ஒரு மாஸ் கதை தேவைப் படுகிறது. அம்மாதிரியான லைன்களை எங்கே பார்த்தாலும் கேட்கிறார்கள். பத்து வருடங்களுக்கு முன் நான் ஒரு பிரபல கதாநாயகனுக்கு ஒர் ஒன்லைன் சென்னேன். “ஊருலேந்து சென்னைக்கு வர்றான் ஒருத்தன். எதுக்குடா வந்தேன்னு கேட்டா? பெரிய டான் ஆகணும்னு வந்தேனு சொல்றானு” சொன்னேன். அட என்று அடுத்த ஒருவாரத்தில் கதை கேட்டார். அடுத்த ஒரு மாதத்தில் ஒரு படம் ஆரம்பம் ஆனது தெலுங்கில். பிரபல நடிகர் நடித்து. சூப்பர் டூப்பர் ஹிட். அவரோட முதல் சீன் இந்த வசனம் தான். நான் சொன்னது சென்னையில் . படமெடுத்தது ஆந்திராவில். ஸோ.. அது என் கதை என்று கேஸ் போட முகாந்திரமே இல்லை பட்.. என் ஒன்லைன் யார் மூலமாகவாவது அங்கே சென்றிருக்கலாம். ஏனென்றால் திரைத்துறையைப் பொறுத்தவரை தமிழ், தெலுங்கு என்று மொழி பேதமெல்லாம் கிடையாது. ஹிட்டு கதை, அதுவும் பெரிய ஹீரோவுக்கான கதை பிடிப்பது மிகவும் கஷ்டம். நான் இன்னும் மெருகேற்றி அதே கதையை வேறு ஒரு கோணத்தில் அஹே ஒன்லைனை இன்னும் கொஞ்சம் மாற்றி வைத்துள்ளேன். அது என்னவென்றால்.. ஆங். .அஸ்கு புஸ்கு. .சொல்ல மாட்டேன்.

பாருங்கள் எவ்வளவு யோசித்து பார்த்து பேச வேண்டியிருக்கிறது?. ஆனால் இம்மாதிரியான கதை பிரச்சனைகள் எல்லாம் சிறு முதலீட்டு படங்களுக்கு வந்திருக்கிறதா என்று பார்த்தால் பெரும்பாலும் இல்லை என்றே சொல்ல வேண்டும். அப்படியே வந்தாலும், தெரிந்தவர்கள் மத்தியில் பேசப்பட்டு, வெறும் க்ரெடிட் மட்டுமே கொடுக்கப்பட்டு பஞ்சாயத்து முடிந்த கதைகள் நிறைய இருந்தாலும், பெரிய நடிகர்கள், இயக்குனர்கள் படங்களுக்கே இந்த பிரச்சனை பெரிதாய் தலை தூக்குகிறது. ஏன் சண்டியர் என்று கமல் தன் படத்துக்கு பெயர் வைத்த போது கொதித்தெழுந்த கிருஷ்ண்சாமி.சில வருடங்களுக்கு பின் அதே பெயரில் வந்த ஒரு சிறு முதலீட்டு படத்திற்கு எந்த பிரச்சனையும் செய்யவில்லை.

சங்கரின் எந்திரன் படத்திற்கும் என் கதை என்று பஞ்சாயத்து இன்று வரை கோர்ட்டு கேஸு என்று அலைந்து கொண்டுதானிருக்கிறார்கள். ஆனால் யோசித்து பாருங்கள். இம்மாதிரியான பல ரோபோ கதைகள் எத்தனை ஹாலிவுட்டில் வந்திருக்கிறது. ஜேம்ஸ்பாண்டும், மிஷன் இம்பாஸிபிள் ஹீரோவும் ஹீரோயினை கசமுசா செய்வதைத் தவிர செய்வதெல்லாம் ஒன்றே. இன்றளவில் யாரும் அதை என் கதையை காப்பியடிச்சிட்டான் என்று சண்டைப் போட்டதில்லை. காரணம் அவர்கள் தங்களது கேரக்டர்களிடையே உள்ள் விஷயங்கள் வரை முறை படுத்தியிருக்கிறார்கள். ரிஜ்ஸ்டர் செய்திருக்கிறார்கள். காப்புரிமை பெற்றிருக்கிறார்கள்.

ஆனால் இங்கே காப்புரிமை என்பது எல்லாம் வெறும் வெத்து வேட்டு. இங்கே வசனகர்த்தாவாக பணியமர்த்தப்படுகிறவர் செய்கிற வேலை திரைக்கதை எழுதுவதும் கூடத்தான். ஆனால் க்ரெடிட் வசனத்துக்கு மட்டுமே. இதை உணர்ந்தே எழுத்தாளர்களும் பயணிக்க வேண்டியிருக்கிறது.

சில வருடங்களுக்கு முன் நண்பர் ஒருவர் புதிய இயக்குனருக்கு அட்வான்ஸ் கொடுத்திருந்தார். அவரிடம் கதை கேட்கச் சொன்னார். கேட்க ஆரம்பித்த மாத்திரத்தில் அது எந்த படத்திலிருந்து உட்டாலக்கடி செய்யப்பட்டது என்று புரிந்து விட்டது. இருந்தாலும் பொறுமையாய் கேட்டுவிட்டு, தம்பி கதை நல்லாருக்கு ஏற்கனவே ஹிட்டடிச்ச கொரியன் படம் தான். பட்.. இதே படத்த சூட்டிங் எடுத்து முடிச்சிட்டாங்க. அடுத்த மாசம் ரிலீஸ் என்றேன். தற்போது கூட ஒரே கொரியன் படத்தை இரண்டு அறிமுக இயக்குனர்கள் எடுத்துக் கொண்டிருக்கிறார்கள் என்று அந்த ரெண்டு படங்களிலும் நடித்த நடிகர் சொன்னார். ரெண்டிலும் அதே கேரக்டராம். எது முந்திக்கிதோ அதுக்கு நல்லது.

அதே போல படம் பண்ணுவதற்காக கதை பண்ணிக் கொண்டிருந்தவரிடம் நிதமும் காலையில் வீட்டிலிருந்து டிபன் கொண்டு போய் கொடுத்து, கதையை கேட்டுவிட்டு, அதை தன் கதையாய் என்னிடம் சொல்லி கொண்டிருந்த ஒர் உதவி இயக்குனரை எனக்கு தெரியும். ஒரு சமயம் ஒரிஜினல் இயக்குனர் என்னிடம் கதை சொன்ன போது அதிர்ச்சியாகி இது நம்ம அஸிஸ்டெண்ட் டைரக்டர் கதையில்ல என்று கேட்டே விட்டேன். அவர் தன் கதை தான் என்று நிருபிப்பதற்கு என்னிடமே படாத பாடு பட வேண்டியிருக்கிறது.  


மொத்தமா ஏழே ஏழு கதை தான் அதை தான் அவனவன் திறமைக்கு உருட்டி பிரட்டி பண்ணிட்டிருக்கான்னு சொல்வாங்க. மொத்தமா தொடர்ந்து ஏழு சீன் ஒன்னாயிருந்தா கதை உரிமை கேட்கலாம்னு புரளியாய் ஓடிக்கிட்டிருக்கிற ரூல் ஒண்ணு இருக்கு. இன்றைய தேதிக்கு கதை உரிமை என்பது சங்கத்தில் பதிந்தாலும் கோர்ட் தான் இறுதி என்கிற நிலைமை இருக்க, வேறு வழியில்லை நம் கதையை நாம் காப்பாற்றிக் கொள்ள அத்தனை வழிகளையும் பயன் படுத்தியே தீர வேண்டும். நான் என் கதைகளை மின்னஞ்சல் மூலமாய்தான் அனுப்புகிறேன். தேதி, நேரம், யாருக்கு அனுப்புகிறோம் என்று உறுதியாய் தெரிந்துவிடும். அவர் தான் கதையை திருடினார் என்றால் நிச்சயம் மாட்டிக் கொள்வார்கள். அதை என் கதை என்று உரிமை கொண்டாட முடியாது. அதிலேயும் பணம் உள்ளவர்கள் தில்லாலங்கடி செய்தாவது கேஸில் வெற்றி பெருகிறவர்கள் இருக்கிற ஊர் தான் என்பதால் சட்டபடி எத்தனை வழிகள் உண்டோ அத்தனை வழிகளிலும் என்னுடயது என்று பதிந்து வைத்துக் கொள்வதே வழி. ஏனென்றால் அத்தனை சண்டை போட்ட மீஞ்சூர் கோபி, இன்றைக்கு அதைப் பற்றி பேச விரும்பவில்லை என்கிறார். ஸோ.. அறம் குறித்த கேள்வி கேட்க யோசனையாய் இருக்கிறது.

Mar 15, 2019

வரதன் – ஐரோப்பிய படங்களின் தாக்கம்.

வரதன் – ஐரோப்பிய படங்களின் தாக்கம்.
பொதுவாகவே மலையாள படங்களில் ஐரோப்பிய படங்களின் தாக்கம் அதிகமாய் இருக்கும். பிரியதர்ஷன் காலத்திலிருந்தே அம்மாதிரியான விஷயங்கள் அங்கு அதிகம். அதற்கு முக்கிய காரணம் தனிமையான வீடுகள். அமைதி. நகர்புறதன்மையற்ற கதைகளை எடுக்கக்கூடிய நிலப்பரப்பு. கிருஸ்துவ குடும்ப அமைப்புகள். தனிமை. குடும்பத்தோடு குடிப்பது என்பது போன்ற பல விஷயங்களை சொல்லலாம்.

நாடே பல மொழிகளில் கொண்டாடிய திருஷ்யம் ஒரு ஜப்பானிய மொழியாக்கம் என்பது இன்றளவில் உள்ளக் குற்றச்சாட்டாக இருந்தாலும் மலையாளிகள் மிகச் சிறப்பாய் கதைகளை அவர்களுக்கான படங்களாய் ஆக்குவதில் வல்லவர்கள். அதற்கு காரணம் அங்குள்ள எழுத்தாளர்கள். இன்றளவில் எழுத்தாளர்களை கதையின் நாயகர்கள் அளவுக்கு கொண்டாடிக்  கொண்டிருக்கும் ஒரே திரையுலகம் மலையாள உலகம் தான். பல சமயங்களில் அசாதாரணமான கதைகளை மிகச் சாதாரணமாய் எழுதிக் கொடுத்துவிடுவார்கள்.

பட்டர்ப்ளை ஆன் வீல்ஸ் என்ற ஹாலிவுட் படம். நம்ம ஜேம்ஸ்பாண்ட் பியர்ஸ் ப்ரான்சன் நடித்திருப்பார். அது ஒரு த்ரில்லர் வகை படம்  அதை மலையாளத்தில் காக்டெயிலாக்கி கொடுத்திருந்தார்கள்  வெற்றியும் பெற்றார்கள். அதே நேரத்தில் என் நண்பர் ஒருவர் என்னிடம் ஒரிஜினல் படத்தைக் கொடுத்து அதை தமிழில் திரைக்கதையாக்கி தருமாறு கேட்டிருந்தார். படத்தைப் பார்த்ததும் யாரோ இதை படமாக தமிழில் எடுத்துக் கொண்டிருப்பதாய் எனக்கு தகவல் வந்ததாய் சம்சமயம். எனவே விசாரிக்க ஆரம்பித்தேன். கண்டு பிடித்து அதிர்ச்சியடைந்தேன். அதற்கு ரெண்டு காரணங்கள் ஒன்று. அதை தயாரித்து நடித்துக் கொண்டிருந்தவர் பவர் ஸ்டார் சீனிவாசன். அதை விட அதிர்ச்சியான விஷயம் தெரிந்தோ தெரியாமலோ எந்த படத்தை தழுவி எடுத்துக் கொண்டிருக்கிறார்களோ அந்த படத்தின் பெயரையே டேக் லைனாக வைத்திருந்த புதுமை.  அந்த படம் பெயர் லத்திகா. இப்போது புரியும் எனக்கு ஏன் அதிர்ச்சி ஏற்பட்டது என. ஆனால் ஒரு பெரிய காமெடி என்னவென்றால் ஆங்கிலத்தில் வந்து, மலையாளத்தில் தழுவி, தமிழிலும் தழுவப்பட்ட அதே கதையை மலையளத்திலிருந்து உரிமை வாங்கி இங்கே மீண்டும் தமிழில் படமாக்கி தோல்வியடைந்தார்கள். இப்படியான கதைகள் பல உண்டு. இம்மாதிரியான படங்கள் மலையாளத்தி ஹிட்டடிக்கும் தமிழில் கொஞ்சம் கஷ்டமே.

அங்காமாலி டைரீஸ், நண்டுகளோட நாட்டில் ஒர் இடைவேளா, திருஷ்யம், தொண்டிமுதலும் த்ரிக்‌ஷாக்‌ஷியும், மகேஷிண்டே பிரதிகாரம் என பெரிய லிஸ்ட் போட்டுக் கொண்டேயிருக்கலாம். ஆனால் இவைகளைப் போல மண்ணின் கதைகளனில்லாமல், த்ரில்லர் வகை படங்களுக்கு அமெரிக்க படங்களை விட ஐரோப்பிய படங்களை தங்களது கதைகளாய் மாற்றி கொண்டு வெற்றியும் பெற்றிருக்கிறார்கள். குறிப்பாய் பயணம் சார்ந்து, தேடுதல், பழிவாங்குதல், என பல வகைகளை தங்களுடயதாக்கியிருக்கிறார்கள். அப்படியான ஒரு படத்தை இந்த வாரம் பார்க்க நேரிட்டது.

அது வரதன் என்கிற பகத் பாஸில் நடித்த படம். அமல் நீரத் இயக்கத்தில் வெளிவந்திருக்கும் இப்படத்தின் கதை ஐரோப்பிய படங்களின் கதைகளை ஒத்திருக்கிறது. அடிப்படையில் ஒளிப்பதிவாளரான இவரின் பெரும்பாலான படங்கள் ஒளிப்பதிவுக்கு பேர் பெற்றதாகவும், மேக்கிங்கில் அழகுணர்வு மிக்கதாகவும் அமைந்திருக்கும். 5 சுந்தரிகள், அயோபிண்டே புஸ்தகம்,காம்ரேட் இன் அமெரிக்கா, போன்ற படங்கள் இப்படத்தில் 

துபாயிலிருந்து வேலைப் பிரச்சனை காரணமாய் கேரளாவுக்கு வருகிறார்கள் பகத்தும், ஐஸ்வர்யா லஷ்மியும். அவர்களுக்கான் எஸ்டேட் வீட்டில் வந்து செட்டிலாகிறார்கள். தனியான எஸ்டேட் வீடு. சுற்றிலும் அதீத அமைதி. ஆனால் ஏதோ ஒரு உருத்தல், ஐஸ்வர்யாவின் மனதில் ஈஷிக் கொண்டே இருக்கிறது.  அது அவளின் அழகை அடைய விரும்பும் அவளது பழைய ஸ்கூல் நண்பர்கள் முதற்க் கொண்டு ஊரில் பச்சோந்தியாய் அலையும் கிழவன் வரை.

கதையின் முதல் பாகம் வரை, கொஞ்சம் கொஞ்சமாய் மெதுவாய்ய்ய்ய்ய்ய் சம்பவங்கள் அரங்கேறுகிறது. ஒரு கட்டத்தில் சலிப்பேறி ஏதாச்சும் ஒண்ணை பண்ணித் தொலைங்கய்யா என்று புலம்பிவிடும் அளவிற்கு. கணவனிடம் முறையிடுகிறாள். அவன் சாத்வீகமாய் எல்லாம் முயற்சியும் செய்கிறான். இதன் நடுவில் பிரச்சனைக்குரிய குடும்பத்தில் இருக்கும் பள்ளிப் பெண்ணுக்கும், மாற்று ஜாதி ஏழை பள்ளிச் சிறுவனுக்குமிடையே ஆன காதல். அந்த பையன் இவர்கள் வீட்டில் அடைக்கலமாய் வந்தடைய.ப்ரச்சனை முற்றுகிறது. அதன் பிறகு நடக்கும் விஷயங்கள் நிஜமாகவே விஷுவலாய் அதகளம்தான். அப்படியொரு ஆக்‌ஷன் காட்சிகள். சமயோஜித புத்தியோடு அமைக்கப்பட்ட சண்டைக் காட்சிகள் பெரும் ஆசுவாசமாய் இருந்தாலும், மொத்த படத்தையும் பார்த்து முடித்துவிட்டு எழும் போது எதற்கு இப்படி நம்ப முடியாத அளவிற்கான  ஹீரோயிசம் என்ற கேள்வி எழாமல் இல்லை. ஏனென்றால் நாயகன் கதைப் படி சாதாரணன். வெளிநாட்டில் வாழ்ந்தவன். அதைத் தவிர வேறெந்த சிறப்பு பயிற்சியும் பெற்றவனில்லை எனும் பட்சத்தில் மலையாள படங்களில் இருக்கும் இயல்புத்தன்மை அடிப்பட்டுப் போய் வெறும் காட்சி அதிசயமாகி போய்விட்டது என்றே சொல்ல வேண்டும்.


அற்புதமான காட்சிப்படுத்தல்கள். தேர்ந்த நடிப்பு. கதைக்கு ஏற்றாப் போலான இடங்கள். என மிக அழகாய் பொறுக்கியெடுத்திருக்கிறார்கள். திரைக்கதையைத் தவிர என்று சொல்ல வேண்டும். கொஞ்சமே கொஞ்சம் நம்பகத்தன்மையுடனான கேரக்டர்களை வரையறுத்திருந்தால் நிச்சயம் ஒர் அபாரமான சர்வைவல் திரில்லர் வகை படமாய் அமைந்திருக்கும். அப்படி அமைக்காது விட்டதால் பிரபல ஹாலிவுட் படமான “ஹோம் அலோன்’ படத்தில் வீட்டில் திருட வரும் திருடர்களை ஒர் சிறுவன் எப்படி தந்திரங்களை பயன்படுத்தி, லாஜிக் இல்லாவிட்டாலும் சுவார்ஸ்யத்திற்கு பஞ்சமில்லாத ஐடியாக்களினால் நம்மை ஈர்த்த விஷயம் தான் நியாபகம் வருகிறது. ஐரோப்பிய படங்களிலிருந்து அமெரிக்க படங்களுக்கான தாவலோ? இல்லை ஒரிஜினலின் சாயல் தெரிந்துவிடக்கூடாது என்பதற்காக எடுக்கப்பட்ட முயற்சியா? என்ற யோசனை தோன்றாமல் இல்லை. பல சமயங்களில் பல வெளிநாட்டுப் படங்கள் மலையாள சினிமாவுக்கு நல்ல சுவாரஸ்ய படங்களை தந்திருக்கிறது என்பதையும் மறுக்க முடியாது.

Mar 14, 2019

Manmarziyan

Manmarziyan
சுவாரஸ்யமான கதைகள் என்று பார்த்தால் அது மனித உறவுகளிடையே ஏற்படும் புரிதல் சார்ந்த பிரச்சனைகள் தான் என்பேன். உறவுகளிடையே இருக்கும் முரண் தான் மிக சுவாரஸ்யம். அந்த வகையில் முன் காலத்தில் எல்லாம் நிறைய படங்கள் அம்மாதிரியான கதைக்களன்களை சார்ந்து வந்து கொண்டிருந்தது. இப்போது உறவுகள் சார்ந்த கதைகள் வராமல் இல்லை. அவையனைத்தும் இளைஞர்கள் சார்ந்த கதைக் களன்களாய் இருப்பதால், நெகிழ்ச்சிக்கோ, காதலைத் தவிர உணர்வு பூர்வமான விஷயங்களுக்கோ முக்யத்துவம் இல்லாமல் வந்து கொண்டுதானிருக்கிறது. அப்படியான இளைஞர்களின் வாழ்க்கை, காதல் கல்யாணம் சார்ந்த நெகிழ்ச்சியுட்டும் திரைப்படங்கள் குறிப்பிடத்தக்கவை நெஞ்சத்தை கிள்ளாதே.

பின்நாளில் மணிரத்னம் மெளனராகம் படம் இன்றளவும் பேசப்பட்டுக் கொண்டிருப்பதற்கான காரணம் காதலும், அது பின் சார்ந்த உளவியம் குழப்பங்களும், அதனால் தற்காலத்தில் ஏற்படும் திருமண பந்த பிரச்சனைகளும் தான். கொஞ்சம் சென்சிபிளாக படமெடுக்க வேண்டி நினைக்கிறவர்கள் ஜாக்கிரதையாய் தொடுவார்கள். அப்படியான படங்கள் மிக சிலவே வெற்றி பெற்றிருக்கிறது.

கொஞ்சம் காலமாய் டார்க் படங்களிலிருந்து விலகி, சீரியஸாய் ஸ்மால் டவுன் காதல் படங்களாய் எடுத்துக் கொண்டிருக்கும் அனுராக் காஷ்யப்பின் லேட்டஸ்ட் மன்மர்ஜியான். ரூமிக்கும் விக்கிக்கும் காதல். இவர்களின் காதல் பெரும்பாலும் அதீத காமத்தினூடே ஊடாடிக் கொண்டிருக்க, ஒரு நாள் வீட்டில் மாட்டிக் கொள்கிறார்கள். இப்படி இருப்பதெல்லாம் வேலைக்கு ஆகாது. நீ அவனை திருமணம் செய்து கொள்ள வீட்டிலிருந்து பெண் கேட்டு வரச் சொல் என்கிறார்கள். அவனுக்கு திருமணம் செய்ய பிடிக்கவில்லை. தான் இன்னும் நிறைய செய்ய வேண்டும். பிரபலமனா டி.ஜே ஆக வேண்டுமென்ற பல கனவுகள். அதனால் தவிர்க்கிறான். வீட்டில் பார்க்கும் மாப்பிள்ளையை மணக்க சம்மதிக்கிறாள் ரூமி.  ரோபி மாப்பிள்ளையாய் நுழைகிறான். அதன் பின் என்ன நடக்கிறது என்பது கதை.

சேம் டெம்ப்ளேட் மெளனராகம்தான். ஆனால் கையாண்ட விதத்தில் தான் படம் வேற கலர். முக்கியமாய் டயர் டூ சிட்டியான சண்டிகார் போன்ற நகரத்தின் பின்னணி. அதன் கலாச்சாரம். அங்கே “போல்டாய்” இருக்கும் ரூமி போன்ற பெண். டிஜி. அமைதியான ரோபி. என வித்யாசமான கேரக்டர்கள். ரூமியாய் டாப்ஸி. முழு படத்தையும் தன் தோளில் தூக்கி சுமக்கிறார். எத்தனை எமோஷன்கள் அவரிடம். காதல், காமம்,குழப்பம்.,என கலந்து கட்டி வெளிப்படுத்தும் பாடி லேங்குவேஜ். எல்லாம் ஆசம். விக்கி கவுசல். மனிதன் செம்ம. ஆட்டிடியூட். எமோஷனல் க்ரூக்காக எக்ஸெண்ட்ரிக் பாடிலேங்குவேஜில் இக்கால நிலையில்லாத, கனவுகளில் மிதக்கும் இளைஞனை கண் முன் காட்டுகிறார். அபிஷேக் பச்சன். கண்ட்ரோல்ட் பர்பாமென்ஸ்.

படம் நெடுக ரூமியின் குழப்பமான ரெட்டை மனநிலையை குறிக்கும் வகையில் வரும் ரெட்டையர் பெண்களின் நடனங்கள். ஏன் கஷ்மீரில் வரும் வழிப்போக்கர்களாய் வரும் ஆண் ரெட்டையர்.  ரெட்டையர் பெண்களின் அபார நடனம். பின்னணியில் என்பது அடி ரோடி ட்ராபிக்கை வைத்துக் கொண்டு போர் க்ரவுண்டில் ஆடும் காட்சி விஷுவல் ட்ரீட்.

மிக நெருக்கமான செக்ஸ் காட்சிகள். சண்டிகர் மாதிரியான டயர் டூ நகர்களில் வசிக்கும் பெண்களுக்கு இத்தனை சுதந்திரமா? என்ற கேள்விகளை எழுப்பும் படியான கேரக்டரைஷேஷன். எந்த முடிவையும் சரியாய் எடுக்காமல் அலை பாய்ந்து கொண்டிருக்கும் கேரக்டர்கள் சுவாரஸ்யம் தான் என்றாலும், திரும்பத் திரும்ப அதையே செய்து கொண்டிருப்பதைப் பார்க்கும் போது அட ஏதாச்சும் ஒன்னை டிசைட் பண்ணும்மா என்று பொறுமையிழக்க வைக்கிறார்கள். அபிஷேக் பச்சனின் கேரக்டரில் ஏன் இத்தனை ப்ரச்சனையுடைய பெண்ணை அடைய நினைக்கிறான் என்கிற கேள்விக்கான பதில் ஸ்ட்ராங்காய் இல்லை.


ஆனால் அவர்களுக்குள் ஏற்படும் நெருக்கம் உருவாகும் காட்சி. மெல்ல பேசிக்கொள்ளும் வசனங்கள். முக்கியமாய் க்ளைமேக்ஸில் பேசிக் கொள்ளும் வசனங்கள் பியாண்ட் சன்ஷைன் டைப் வசனங்கள் சுவாரஸ்யம். அமித் திரிவேதியின் இசை மிகப் பெரிய பலம். கன்வன்ஷனலான ஊரில் நடக்கும் கதைக்கும் அன்கன்வன்ஷனலான இசை. முரண் தான் ஈர்ப்பு. இன்னும் கொஞ்சம் கேரக்டர்களிலும், அதன் பின்னணியையும் சரியாய், அழுத்தமாய் கொடுத்திருந்தால் நீங்காத ஒர் இடத்தை இப்படம் அடைந்திருக்கும் என்று தோன்றுகிறது. முக்காபாஸில் கலக்கிய அனுராக் இதில் கொஞ்சம் தளர்வடைந்திருக்கிறார் என்றே சொல்ல வேண்டும்.

Mar 12, 2019

சாப்பாட்டுக்கடை - குடைக்கடை பிரியாணி -கே.கே.நகர்


நண்பர் நல்ல பிரியாணி மாஸ்டர். நிறைய முறை அவர் வேலை செய்த ஓட்டலில் இருந்து பிரியாணி கொண்டு வந்து கொடுத்திருக்கிறார். நன்றாகவே இருக்கும். இவரின் முதல் அறிமுகமே இன்னொரு நண்பர் கடலூரில் ஆரம்பித்திருந்த பிரியாணி கடையில் மாஸ்டராய்த்தான். பின்பு பல வருடங்களுக்கு பிறகு தற்போது சொந்தமாய் பிரியாணிக்கடை போடப் போவதாகவும், அதுவும் மொபைல் கடையாய் போடப் போவதாய் சொல்லியிருந்தார். சொன்னது போலவே அமாவாசை அன்று கே.கே. நகர், முனிசாமி சாலையில் ஆர்.டி.ஓ செக் செய்யும் மைதானத்தின் ப்ளாட்பாரத்தில் ஒர் டி.வி.எஸ்.50யில், குடையோடு ஒரு பிரியாணி கடை அமைத்திருந்தார். 

நல்ல தரமான அரிசியில், நன்கு வெந்த சிக்கன் பீசுகளோடு பிரியாணி மணமாய் இருந்தது. தொடர்ந்து பத்து நாட்களுக்கு மேல் குவாலிட்டி கண்ட்ரோல் செக் செய்து தர நிர்ணையம் கொடுத்துவிட்டேன். நல்ல தரமான சிக்கன் பிரியாணி வேண்டும் என்கிறவர்கள் நிச்சயம் ஒர் ட்ரை செய்ய வேண்டிய இடம். 

வழக்கமாய் கையேந்தி பவன் ஓட்டல்களில் குறித்தும் விலை குறைவான பிரியாணி என்றாலே காக்கா பிரியாணியாக இருக்குமோ என்கிற பொதுபுத்தி பயத்தை வேறு மீடியாக்கள் கிளப்பிவிட்டிருக்க, இந்த மொபைல் கடை அந்த நம்பத்தன்மையை கொடுக்கிறதா? என்று கேட்டீர்களானால் நிச்சயம் கொடுக்கிறது என்பேன். நல்ல தரமான பாஸுமதி அரசியில், சரிக்கு சரி சிக்கன் போட்டு சமைக்கப்படுகிறதை நானே சாப்பிட்டு இருப்பதால் உறுதியளிக்கிறேன்.

அடுத்த வாரத்திலிருந்து சனி தோறும்  அறுபது பிரியாணி ஆர்டர் கிடைத்திருக்கிறது என்கிற செய்தியே பிரியாணியின் தரத்திற்கு இன்னொரு சான்று.

பல்லாவரம் யா மொய்தீன் பிரியாணி ஒரு தள்ளுவண்டியில் ஆரம்பிக்கப் பட்டதுதான். அது போல் நண்பரின் கடையும் அமைய வாழ்த்துக்கள். ரோட்டில் நின்று சாப்பிட விரும்பாதவர்கள், பார்சல் செய்து கொண்டு போயாவது ஆதரவு தெரிவிக்கலாம். ஆஃப் பிரியாணி முட்டையோடு 80 ரூபாய். குவாட்டர் முட்டையோடு 60 ருபாய். 

குடைகடை பிரியாணி
முனுசாமி சாலை 
ஆர்.டி.ஓ. மைதானம் அருகில்
கே.கே.நகர்.
சென்னை 
தொடர்புக்கு : சபா : 9600167710

GHOUL - Web series

Ghoul
ஒரு காலத்தில் தமிழில் ஜெய்சங்கர் தொடர்ந்து ஒரே டைரக்டரின் படங்களில் ஹீரோவாக வலம் வந்து கொண்டிருப்பார். அந்த படம் வெற்றி தோல்வி பற்றியெல்லாம் கவலைப் படாமல் தொடர்ந்து நடித்துக் கொடுப்பார். அதே போல ஆர்யா தொடர்ந்து விஷ்ணுவர்தனின் படங்களில் நடித்திருப்பார். அது போல ராதிகா ஆப்தே, அனுராக் கஷ்யப்பின் படங்களில் நடிப்பது. குறிப்பாய் நெட்ப்ளிக்ஸில் இவர்கள் படங்கள் வெளியாக ஆரம்பித்தபிறகு மீம்ஸ் போடுமளவுக்கு ராதிகா ஆப்தேவின் ஆக்ரமிப்பு.

சமீபத்தில் வெளியான லஸ்ட் ஸ்டோரிஸில் நடிப்பு மட்டுமில்லாமல் , கதை வசனத்திலும் இவரது பங்களீப்பு இருந்தது. ஒரு புதிய நெட்ப்ளிக்ஸ் படத்தில் ராதிகா ஆப்தேவே எல்லா கேரக்டர்களிலும் நடிப்பது போன்ற ஒரு விளம்பரத்தை ராதிகாவே வெளியிட்டிருந்தார். அது கிண்டலுக்காக வெளியிடப்பட்டது என்று நினைத்தால் நிஜமாகவே அப்படி ஒரு திரைப்படம் வெளியாக இருக்கிறது என்று சொல்கிறார் விக்ரமாதித்ய மோத்வானி.

இத்தனை களேபரங்கள், விமர்சனங்களுக்கு நடுவில் ராதிகா ஆப்தே ஒன்றும் திறமையில்லாதவர் இல்லை ஒவ்வொரு  ப்ராஜெக்டிலும் தன் திறமையை நிருபித்துக் கொண்டேதானிருக்கிறார். ஒரு சில இயக்குனர்களுக்கு சிலருடய நடிப்பும், திறமையும் மிக இயல்பாய் பிடித்துப் போய் தொடர்ந்து அவர்களுடன் பயணிப்பது சுலபமாய் இருக்கும். எனக்கு கூட என் முதல் பட ஹீரோ தமனோடு அடுத்தடுத்து பயணிப்பது மிக சுலபமாய் இருந்திருக்கிறது. அப்படி ஒரு டீமாய் பயணித்துக் கொண்டிருக்கும் அனுராக், மோத்வானி குழுவிலிருந்து ஒரு புதிய மினி வெப் சீரீஸ் தான் கவுல்.
எதிர்காலத்தில் நடக்கும் கதை. அரசை விமர்சிக்கும், எதிர் கருத்தை வைக்கும் யாரையும் சகிக்க முடியாத அரசு. அவர்களை தீவிரவாதியாய் முத்திரை குத்தப்பட்டு சிறையில் அடைத்து மக்களை காப்பதாய் வெளிக்காட்டிக் கொண்டிருக்கும் அரசில் ராணுவ அதிகாரியாய் பயிற்சி முடிந்து சேருகிறார். நாட்டு பற்று மிகவும் அதிகமுடையவர். அதன் காரணமாய் தடை செய்யப்பட்ட புத்த்கத்தை தன் தந்தை வைத்திருக்கிறார் என்பதை அறிந்து அவரை ராணுவத்தினரிடம் பிடித்து கொடுக்கும் அளவுக்கு நாட்டுப்பற்று.

ரெடெம்ஷன் செண்டர் எனும் இடத்தில் அவர்களை வைத்து விசாரிப்பார்கள். அப்படியான ஒர் முக்கிய தனி இடத்தில் முஸ்லிம் தீவிரவாதிகளை அடைத்து வைத்து விசாரிக்கின்ற இடத்தில் வேலைக்கு சேருகிறார். அங்கே தர்ட் டிகிரி என்பதெல்லாம் ஒன்றுமேயில்லை எனும் அளவுக்கு படு கொடூரமான விசாரணை முறைகள். அவற்றை பின்பற்றி தீவிரவாத செயல்களை தடை செய்ய முயற்சித்து கொண்டிருக்கிறார்கள். அப்படியான ஒரு பெரும் தீவிரவாதியை, சமீபத்தில் பெரும் உயிர் சேதத்துக்கு காரணமானவனுமான அலி சையத்தை கைது செய்து கூட்டி வருகிறார்கள். அவனை விசாரிக்கும் பொறுப்பை ஏற்று அவனை பேச வைக்க முயல்கிறார்கள். அப்போதிலிருந்து அங்கு நடக்கும் அமானுஷ்ய நிகழ்வுகளும், அதன் தொடர்ச்சியும்  பெரும் அதிர்ச்சியை கொடுக்கிறது. இது தான் கவுலின் கதை. கவுல் எனும் அரேபிய சாத்தான். மனித உடல்களை தின்று வளரும் சாத்தான் என்று அரேபியகதைகளில் உலவும் விஷயம். அப்படியான சாத்தானை அழைத்தது யார்? எதற்காக? என்று முதல் எபிசோடுக்கு பிறகு நம்மை கட்டிப் போடுகிறது.

சில ஷாட்கள் நிஜமாகவே முதுகுத்தண்டை சில்லிட வைக்கிறது. ராதிகா ஆப்தேவின் நடிப்பு ஆரம்பக் காட்சிகள் லேசாய் ஒட்டாமல் இருந்தாலும் அவர் உள்ளே இருக்கும் கேள்விகளும், அதற்கான பதில்கள் கிடைக்க, கிடைக்க, விஷுவலாய் கிடைக்கும் அதிர்ச்சிகளும் அவரின் நடிப்பின் மீதான அபிப்ப்ராயத்தை மாற்றி விடுகிறது.


மூன்று எபிசோடுக்காக கொஞ்சமே கொஞ்சம் நீட்டிக்க பட்டிருப்பதாய் தோன்றினாலும், டெக்னிக்கலாய் அசத்தியிருக்கிறார்கள். அஹா இது போல எதுவுமே வந்ததில்லை என்பது போன்ற களம் இல்லை என்றாலும், ஒர் புதிய முயற்சி இந்த சீரீஸ் முழுவதும் இருக்கிறது. எந்த விதமான தீவிரவாத செயல்களையும் செய்யாமல் மாட்டிக் கொண்டவனின் கதை ஒன்றும். அவன் ஊமையாய் அலையும் இடங்களையும் பார்க்கும் போது ராஜிவ் காந்தி கொலை வழக்கில் மாட்டிக் கொண்டு அல்லாடுகிறவர்கள் கண் முன் தோன்றி மறைகிறார்கள். சிரீஸ் முழுக்க ஆங்காங்கே சர்காசமாய் வரும் வசனங்கள் அரசுக்க் எதிராய் செயல்படும் விஷயங்கள் என்று சொல்லப்படும் விஷயங்கள் எல்லாம் பி.ஜே.பி அரசை மறைமுகமாய் எள்ளி நகையாடியிருப்பது போல தோன்றுகிறது.  பட். .விஷுவலாகவும், ஹாரர் கதை விரும்பிகளூக்கும் சுவாரஸ்யமான சீரீஸ் கவுல்.

Mar 11, 2019

சாப்பாட்டுக்கடை - உங்க வீட்டு சாப்பாடு

சாலிகிராமத்தில் சொல்லிக் கொள்கிறார்ப் போல நல்ல தரமான வெஜ் உணவகங்கள் அவ்வளவாக கிடையாது. நான் வெஜ் மட்டும் இருக்கிறதா என்று கேட்டீர்களானால் கொஞ்சம் தள்ளி வளசரவாக்கம், விருகம்பாக்கம் பக்கம் போனால் இருக்கிறது. மீண்டும் சரவணபவன், பார்வதி பவனை விட்டால் சிலாக்கியமாய் ஏதுமில்லாத நிலையில் ஒரு ஷூட் இடைவேளையில் நண்பர் நல்ல சாம்பார் சாதம், தயிர்சாதம் வாங்கி வரச் சொன்னார். எங்கிருந்து என்று கேட்க, விஜயகாந்த் வீட்டுக்கு முன்னால் அபுசாலி தெருவில், மாடியில் சின்னக்கடை இருக்கிறது. தக்காளி சாதம், புளி சாதம், லெமன் சாதம், சாம்பார் சாதம் என வகை வகையான சித்ரான்னங்கள் வெறும் நாற்பது ரூபாய்க்கு என்றார். அடுத்த வாரமே அங்கே படையெடுத்தோம்.

படத்தில் காட்டப்பட்டிருக்கும் கருவேப்பிலை சாதம், தக்காளி சாதம், தயிர் சாதம், புளி சாதம், எலுமிச்சை சாதம் எல்லாம் சேர்த்து எவ்வளவு தெரியுமா? ரூ.40 தான். தனியே வாங்கினால் இதே அளவுக்கு முழு சாதம் தருகிறார்கள்.
உதவி இயக்குனர்கள் வெகுவாய் சுற்றியலையும் இந்த ஏரியாவில் இம்மாதிரியான உணவகங்கள் அட்சய பாத்திரம். நல்ல தரமான,சுவையான சாத வகைகள். சரவண பவனிலேயே தயிர் சாதத்திற்கு மாதுளை போடாத காலத்தில் இங்கே கரண்டி தயிர் சாதத்திற்கும் மாதுளையோடுதான் சப்ளை. இது நாள் வரை நான் இங்கு புளீத்த தயிர் சாதம் சாப்பிட்டதேயில்லை.
வீட்டிலிருந்தே செய்து கொண்டு வந்து விடுகிறார்கள். சிப்ஸ், மிக்ஸர், அல்லது காராபூந்தி என நாளொரு மேனிக்கு சைட் டிஷ் வேறு. எல்லாமே வெறும் நாற்பது ரூபாய்க்கு.
விருகம்பாக்கம் போலீஸ் ஸ்டேஷனைத் தாண்டி ஒரு அம்மன் கோயில் ரோட்டிலேயே இருக்கும் அங்கே நின்று மாடியில் பார்த்தால் அந்த சின்ன உணவகம் இருக்கும். தவறாது விசிட் செய்து ஆதரவு கொடுங்கள். நிச்சயம் தரமான, மலிவான வெஜ் உணவகம்.

உங்க வீட்டு சாப்பாடு
அபுசாலி தெரு 
சாலிகிராமம்
விஜய்காந்த் வீடு தாண்டி.

Mar 7, 2019

கள்ளச்சிரிப்பு - வெப் சீரீஸ்

கள்ளச்சிரிப்பு
சென்ற மாதம் இணையம் எங்கும் பல விளம்பரங்கள். புதிய தமிழ் வெப் சீரீஸ்களைப் பற்றிய அறிவிப்புகள் என இருக்க, கோடம்பாக்கத்தில் ஷார்ட் பிலிம் எடுத்துக் கொண்டிருந்தவர்கள் எல்லாம் வெப் சீரீஸ் ஷூட்டிங் போய்க் கொண்டிருக்கிறார்கள். இவர்கள் யாருக்கும் தெரியாது. இவைகளுக்கான மார்கெட் என்ன? எங்கு வியாபாரம் ஆகும்? எப்படி வியாபாரம் ஆகுமென்ற அடிப்படை கூடத் தெரியாமல் சில பல லட்சங்கள் செலவு செய்து கொண்டிருக்கிறார்கள்.

சரி வியாபாரம் தெரியாமல் தான் ஷூட்டிங் நடத்திக் கொண்டிருக்கிறார்கள் என்று பார்த்தால் வெப் சீரீஸ் என்றால் என்ன என்று கூட தெரியாமல் படமெடுத்துக் கொண்டிருக்கிறவர்கள் நிறைய. பேர். குறிப்பாய் கெட்ட வார்த்தைகளை மிகச் சுலபமாய் பேசக்கூடிய மீடியம் என்பதை மட்டுமே மனதில் வைத்துக் கொண்டு, சரளமாய் ஓ.த்தா.. ந்க்கொம்மா என்று ஆண் பெண் பேதமில்லாமல் பேசுவது தான் வெப் சீரீஸின் சுதந்திரம் என்று நினைத்துக் கொண்டிருக்கும் கூட்டம் ஒன்று பரவலாய் இயங்கிக் கொண்டிருக்கிறது. அதற்கு காரணம் தமிழில் வெப் சீரீஸ் என்றவுடன் நியாபகம் வருவது பாலாஜி மோகனின் “ஆஸ் ஐயம் சபரிங் ஃபர்ம் காதல்” தான். அதில் மிக சாதாரணமாய் தமிழ் கெட்ட வார்த்தைகளை பயன்படுத்தியிருந்தார்கள். ஹிந்தியில் வெளிவந்திருக்கும் பல வெப் சீரீஸ்களில் இதே மாதிரியான கெட்ட வார்த்தைகளை பயன்படுத்துவது சகஜமான ஒன்றாய் மாறியிருக்கிறது. ஆனால் கெட்ட வார்த்தை பேசுவதற்காகவே பேசப்படுவதில்லை.

சமீபத்தில்  கள்ளச்சிரிப்பு எனும் வெப் சீரீஸ். கார்த்திக் சுப்பாராஜின் நிறுவனத்திலிருந்து. ஜீ 5 எனும் ஓ.டி.டி. ப்ளாட்பார்மில். வெளியாகியிருக்கிறது. கதை என்று பார்த்தால் தினமும் நாம் டிவி, பேப்பரில் பார்க்கும் கள்ளக்காதல் மேட்டர் தான். அதன் பின்னணியில் உள்ள ஹோமோ செக்ஸுவல், கட்டாய கல்யாணம், உயர் குடி மக்களின் இது பற்றிய எண்ணம் எனத்தான் இந்த கதையும் போகிறது. சுவாரஸ்யத்துக்கு குறைவில்லாத களம் தான். ஆனால் இக்கதை தினத்தந்தி பேப்பர் கொடுக்கும் ஆர்வத்தை கூட கொடுக்கவில்லை. காரணம் மிக மோசமான கேரக்டர் கிரியேஷன்கள்.

முதல் காட்சியில் நடக்கும் ஆக்ஸிடெண்டலான கொலை. அதனை தொடரும் கொலை மறைக்கும் முயற்சிகள் என ஒரு சாதாரணப் பெண் சட்டென தீரமாய் முடிவெடுக்கும் இடம். கொஞ்சம் கூட பதட்டமில்லாமல் பிரச்சனைகளை சமாளிக்கும்விதம் என கொஞ்சம் கூட நம்பத்தகுந்த விதமாய் கேரக்டர்கள் எழுதப்படவில்லை. ஆங்காங்கே காட்சிகளில் அவள் சிறு வயதிலேயே கொஞ்சம் அப்படி இப்படி இருந்தவள் என்பதாய் ஆங்காங்கே வசனங்களில் சொல்லப்பட்டிருந்தாலும், கண் முன்னே காட்டப்படும் கேரக்டர் வெளிப்படும் காட்சிகளில் அவளைபற்றிய எந்த எண்ணமும் ஒழுங்காய் மனதில் உட்காராதினால் மொத்த சீரீஸையும் கடனே என்று தான் பார்க்க வேண்டியிருக்கிறது.

கிட்டத்தட்ட ஒரு கொலை, அதை மறைக்க முயலும் போது நடைபெறும் கொலைகள் என போனாலும், சீனீமாமா பையன் கே என்பதை அடிப்படையாய் வைத்து ஓரு கேரக்டர். கட் த்ரோட்டான கொஞ்சம் கூட பாசமே இல்லாத அப்பா. மிகவும் பாசமான ஹைஸ்பீட் அம்மா என டெம்ப்ளேட் கேரக்டர்கள். சீரீஸ் நெடுக.

சுவரஸ்யமாய் எது இருந்தது என்று சொல்ல வேண்டுமென்றால் நான் லீன்யராய் கல்யாணம், கள்ளக்காதல், நிகழ்வு நடந்த போது இடம் பெற்ற காட்சிளின் பர்செப்ஷன் என எழுதப்பட்ட திரைக்கதை மட்டுமே. அது கூட சொல்லப்பட்ட விதத்திற்காக பாராட்டலாம்.

சீரீஸ் நெடுக, ஃபக், ஓத்தா, ஒம்மால.. மு.கூ. என மிக சகஜமாய் கெட்ட வார்த்தையை பயன்படுத்தியிருக்கிறரகள். ஏன் ஒரு எபிசோடில் வரும் பின்னணியிசையாய் ஓத்தா.. ஒம்மால என்று கோரஸ் கூட போட்டிருக்கிறார்கள். நான் இங்கே கெட்ட வார்த்தை பேசியதால் இதை எழுதவில்லை. கெட்ட வார்த்தையை எங்கே எப்போது பேசுகிறார்கள் என்று சரியாக சொல்லியிருந்தால் எபெக்டிவாய் இருக்க வேண்டியது எல்லாம் திணிக்கப்பட்டதாய் இருக்கிறது என்பதினால்தான்.

உதாரணமாய் அம்மாவிடம் மாஸ்ட்ருபேஷன் பத்தி தன் இரண்டு கை விரல்கள் மூலமாய் நாயகி சொல்லும் காட்சி. அது இக்கதைக்கு தேவையா என்று கேட்டால் இல்லையென்றுதான் சொல்வேன். ஆனால் அதே நேரத்தில் நாயகியின் கள்ளக்காதலன் உன்னை என்னால விடவே முடியாது என்று சொல்லும் போது “அப்படி என்னடா என் கிட்ட” என்று நாயகி கேட்கிறாள். அதற்கு அவன்  “என்னைக்காவது உன்னை மேட்டர் பண்ணி பாத்துருக்கியா? செம்மயான ஆளு நீ உன்ன என்னால மிஸ் பண்ணவே முடியாது”என்கிறான்.
கள்ளக்காதலர்கள். இருவரிடையே உடல் சார்ந்த வேகமும், காமமும் அதிகம் இருக்கும். அதை இம்மாதிரியான வசனங்கள் மூலமாய் பேசிக் கொள்ள அதிக வாய்ப்புள்ள் இடம். ஆனால் தேவையேயில்லாமல் அப்பாவிடம், அம்மாவிடம். ரோட்டில் போகிறவனிடமெல்லாம் ஃபக், ஓத்தா, ஒம்மால போன்ற வசனங்கள் இயக்குனரின் அமெச்சூர் தனத்தையே காட்டுகிறது. மெச்சூரிட்டியை அல்ல.

தமிழில் வந்திருக்கும் வெப் சீரீஸ்களில் கொஞ்சம் காம்ப்ளெக்ஸ்டான களன் என்பதைத்தவிர, அரைவேக்காட்டுத்தனமாய் உட்டாலக்கடி செய்த சீரிஸ் போலத்தான் இதுவும் இருக்கிறது.  தமிழ் வெப் சீரீஸ் போக வேண்டிய தூரம் ரொம்ம்ம்ம்ம்ம்ம்ம்ம்ம்ம்ம்ம்ம்பவே அதிகமிருக்கிறது.


Mar 5, 2019

விட்டுக்கொடுப்பதில்லை உன்னை -கவிதை?

விட்டுக்கொடுப்பதில்லை உன்னை
நான் உன்னை எங்கேயும்
யாரிடத்திலும் விட்டுக்
கொடுப்பதில்லை
நீயும் அது போல் தான் என
உறுதியாய் நம்புகிறேன்
நீ விட்டுக்கொடுத்ததாய்
வரும் செய்தியை
கேட்கும் போதும் நான்
நம்புவதில்லை
ஏனென்றால் நான்
உன்னை எப்போதும்
விட்டுக் கொடுப்பதில்லை

Subbura – Blood on Rome -web series

Subbura – Blood on Rome
அமெரிக்க படங்களுக்கும் மற்ற நாட்டு படங்களுக்கும் நிறைய வித்யாசம் இருக்கும். குறிப்பாய் ஐரோப்பிய படங்களுக்கும் ஹாலிவுட்டுக்கும் நிறைய வித்யாசம் உண்டு. ஆக்‌ஷன் கதைகளைக்கூட கொஞ்சம் அழகுணர்வோடுதான் அவர்கள் எடுக்கிறார்கள். கொஞ்சம் எமோஷனுக்கு முக்யத்துவம் கொடுக்கிறார்கள். ஹாலிவுட் போல ப்ளாஸ்டிக் தனமாய் இல்லை என்றே சொல்ல வேண்டும்.

நம்மூர்  படங்களுக்கும் கொரிய படங்களுக்கும், உடை, உணவு போன்றவற்றில் வித்யாசம் இருந்தாலும், குடும்ப அமைப்புகளில், உறவுகளில் உள்ள பின்னல்கள் எல்லாம் கிட்டதட்ட தமிழ் படம் போலவே இருப்பதால் தான் மிக ஈஸியாக சுட்டுத்தள்ள முடிகிறது. படங்களைப் போலத்தான் வெப் சீரீஸ்களும். ஹாலிவுட் சீரீஸ்கள், கொரிய சீரிஸ்கள் என வரிசைக் கட்டி அணிவகுத்திருக்கும் நெட்பிளிக்ஸில் நிறைய ஐரோப்பிய சீரீஸ்களும் உண்டு. சமீபத்தில் பார்த்த சீரீஸ் சுப்பூரா எனும் இத்தாலிய சீரீஸ். வாடிகனுக்கு சொந்தமான நிலம் ஒன்று இருக்கிறது. அதை அடைய சமுராய் எனும் தாதா கும்பலும், அரசியல் பலமுள்ள ஒரு லாபியிஸ்ட் பெண்ணும், அந்த இடத்துக்கு பக்கத்திலேயே இன்னொரு இடம் வைத்திருக்கும் இன்னொரு தாதா குடும்பமும் ஆசைப் படுகிறது. சமுராய் பெரிய தாதா. இதன் நடுவில் ஜிப்ஸிக்களின் தாதா கும்பல். தேவையேயில்லாமல் ஹெராயின் விற்று பிரச்சனையில் மாட்டிக் கொள்ளும் ஒர் போலீஸ்காரரின் மகன். நேர்மையான அரசியல்வாதி ஒருவனை வைத்து அரசியலில் காய் நகர்த்த அவனை மிரட்டும் சமுராய்.

ப்ரச்சனை நிலம் சம்பந்தப்பட்டதுதான். ஆனால் பின்னணியில்  வாடிகன். பாதிரிமார்களின் செக்ஸுவல் அபிலாஷைகள். கணவனுக்கு துரோகம் செய்து போலீஸ்காரர் மகனுடன் சல்லாபிக்கும் லாபியிஸ்ட்.. மெயின் தாதாவான சமுராய் எல்லா இடத்துக்கும் நேரடியாய் போய் ப்ரச்சனையை எதிர் கொள்ளும் விதமும், பயமுறுத்தும் விதமும் ஸ்லீக் குத்துக்கள். அதே நேரத்தில் இன்னொரு தாதா ஜாயிண்டின் தலைவனை ஒழித்துக்கட்ட சரக்கு விற்ற கல்லூரி மாணவனை வைத்தே கொல்வதும். அந்த பையன், ஜிப்ஸிகளின் இளவரசன், தாதாவின்பையன் மூவரிடையே உருவாகும் நட்பு. ஜிப்சியின் தன்பால் ஈர்ப்பு பிரச்சனை. என டீடெயிலாக தாதாக்கள் ஆனாலும் அழகாய் விரிவாய் சொல்லியிருக்கிறார்கள்.

நட்பினிடையே ஏற்படும் துரோகள் தெரியவரும் போது நடக்கும் உணர்ச்சி போராட்டங்கள். தாதாவின் மறைவுக்கு பிறகு அக்கா – தம்பிக்கிடையே ஏற்படும் துரோக பழிவாங்கல் காட்சிகள் என நிறைய ட்ராமாவோடு ஆர்பாட்டமில்லாத ஒர் தாதாக்கள் கதையை சொல்லியிருக்கிறார்கள்.

அதிரடி எபெஃக்டுகள் கிடையாது. ஆர்ப்பாட்டமான இசை கிடையாது. ரேஸியான பத்து செகண்ட் எடிட் கட் கிடையாது. அடுத்தடுத்த காட்சிகளுக்கு தாவும் போலியாய் பரபரக்கும் திரைக்கதை கிடையாது. ஆனால் ஒவ்வொரு எபிசோடும் நம்மை கட்டிப்போடும் அற்புதமான விஷுவல்கள். ரோமில் எங்கு கேமரா வைத்தாலும் கண்ணுக்கு குளிர்ச்சியாய் இருக்கிறது. தேர்ந்த நடிகர்களின் நடிப்பு. குறிப்பாய் சமுராயாய் வரும் நடிகரின் கண்ட்ரோல்ட் நடிப்பும். ஜிப்ஸி இளைஞனாய் வருகிறவரின் நடிப்பும் அட்டகாசம்.

இவர்களின் சீரீஸ்களில் ஆக்‌ஷன் இருந்தாலும் அதை ஆர அமர மிக பொறுமையாய்த்தான் கையாளுகிறார்கள். கொலைகளைக் கூட தடாலடியாய் திடுமென சட்டுக் கொல்வதில்லை. சீனியர் தாதாவான சமுராய் இந்த டீலுக்காக இரவு பகல் பார்க்காமல் யாருக்கு எங்கே செக் வைத்தால் எங்கு வலிக்கும்? என யோசித்து ஒவ்வொரு மூவாய் செய்யும் இடமாகட்டும். இடையறாத இந்த முயற்சியில் துக்கமில்லாமல் வண்டி ஓட்டிக் கொண்டே தூங்கி விபத்துக்குள்ளாகும் காட்சியும், அந்த இடத்துக்காக சமுராயை மிரட்டும் அவனுக்கும் மேலான அதிகார கூட்டம் அவரது வயதான தாய் மட்டுமே வசிக்கும் வீட்டில் வந்து உட்கார்ந்து மிதமாய் மிரட்டிவிட்டு போன பிறகு, அவரின் வயதான அம்மாவிடம் “ஒண்ணுமில்ல சின்ன பிஸினெஸ் மீட்” என்று சொல்ல அம்மா அதைப் பற்றியெல்லாம் கவலைப்படாமல் “இதுதான் உன் தூக்கத்த கெடுக்குதுன்னா அது ஏன்?” என்று கேட்குமிடம் போல பல எமோஷனல் நிமிடங்கள் சீரீஸ் முழுக்க எழுதப்பட்டிருக்கிறது.

எங்கேயும் விக்கி, அழவில்லை. கண்களில் கண்ணீர் தளும்பி வழியவில்லை. பட் எல்லாமே அளவாய், நாசூக்காய் வெளிப்படுத்துகிறார்கள். விஷுவல்களில் தெரியும் இத்தாலிய பெண்களில் நிர்வாண உடல்களில் இயல்பாகவே ஒர் அழகுணர்வு இருக்கிறதோ என்று தோன்றுகிறது. எத்தனை சுதந்திரம் இருந்தாலும், அதை தேவைக்காக சரியாக கையாளுகிறார்கள். செக்ஸையோ, வன்முறையையோ திணிப்பதில்லை. ஆனால் இவர்களின் வாழ்க்கையில் செக்ஸும், போதையும், வன்முறையும் இழைந்திருக்கிறது என்பதை மறுப்பதற்கில்லை. சுப்போரே ஒர் வித்யாசமான அனுபவம்.


Mar 4, 2019

உயிர் பெரும் பி & சி

உயிர் பெரும் பி & சி
ஒரு வளர்ந்து வரும் நடிகன் ஸ்டார் ஆவது பி &சி எனும் ஏரியாக்களில் வெற்றிக் கொடி நாட்டும் போதுதான். அப்படித்தான் எம்.ஜி.ஆர், சிவாஜி, ரஜினி, கமல், விஜய், அஜித், விஜய்காந்த் என வரிசைக் கட்டி வென்றவர்கள். ஆனால் அவர்களுக்கான படங்கள் சமீபகாலமாய் வருவதில்லை என்று அங்கலாய்ப்பவர்கள் ஒரு புறமிருக்க, இன்னொரு பக்கம் வந்தா மட்டும் ஓடிருதா? என்பார்கள்.

ஆனால் டிஜிட்டல் வருவதற்கு முன் பிலிம் காலங்களில் ஒரு படம் சிட்டிக்களில் ரிலீஸ் ஆகி, மெல்ல, அடுத்தடுத்த செண்டர்களுக்கு சென்று அங்கும் ஒரு பெரிய ரவுண்ட் ஓடி மூச்சு வாங்கி, பிரிண்ட் தேய்ந்து புது பிரிண்டுகள் போடப்பட்ட காலமெல்லாம் இருக்க, இன்று ஒரே நாளில் தமிழ் நாட்டில் உள்ள அத்தனை செண்டர்களிலும் படங்களை திரையிட முடிகிறது. அதனால் பி & சி எனும் ஷிப்டிங் மார்கெட்டே இல்லாமல் போய் விட்ட நிலையில், ஒரே நேரத்தில் அத்துனை அரங்குகளிலும் வெளியாகும் படங்களுக்கான வரவேற்பு கிடைக்கிறதா? என்றால் இல்லையென்றே சொல்ல வேண்டும்.

சமீபத்தில் எங்களது “6 அத்யாயம்” திரைப்படத்தை ஒர் பி செண்டர் ஏரியாவில் வெளியிட்டோம். திரையரங்கு உரிமையாளருக்கு போன் செய்த போது, “அதிசயமா இருக்கு சார். முகம் தெரிஞ்ச ஹீரோக்கள் நடித்த படத்துக்கே 20 பேருக்கு மேல வர மாட்டாங்க மொத ஷோவுக்கு. உங்க படத்துக்கு 120 டிக்கெட் எப்படின்னே புரியலை” என்றார். இதுதான் நிஜ நிலமை பி & சி தியேட்டர்களில்.

சிங்கிள் ஸ்கீரீன் தியேட்டர்கள் காத்தாட ஆரம்பிக்க, மெல்ல அரங்குகள், கொடவுன்களாகவும், கல்யாண மண்டபங்களாகவும் மாற, சிட்டியைப் போல சிலது மல்ட்டி ப்ளெக்ஸுகளாய் உருமாற, மல்ட்டிப்ளெக்ஸ் ஆடியன்ஸை மட்டுமே குறிவைத்து படங்கள் தயாரிக்கப்பட, சிட்டி, செங்கல்பட்டு, கோயம்புத்தூர் ஏரியாக்களில் மட்டுமே கல்லா கட்டும் அர்பன் எனச் சொல்லப்படும் மாநகர கதைகள் அதிகம் வர ஆர்மபித்தது. த்ரில்லர் படங்களும், மார்டர்ன் படங்களும், ப்ளாக் காமெடிக்களும் தான் இந்த மார்கெட்டை தக்க வைத்துக் கொண்டிருக்க, எப்போதோ ஒரு முறை தான் பி & சி ஏரியாக்களுக்கு படங்கள் தயாராகின்றன.

முக்கியமான காரணம் இம்மாதிரியான பி &சி படங்களை பற்றி இணையங்களில் பெரிதாய் கொண்டாடப்படுவதேயில்லை. அது மட்டுமில்லாமல் அப்படங்களை கழுவி கழுவி ஊற்றுகிறார்கள். இணையத்தில் மட்டுமே வெற்றி பெற்றால் போதும் என்கிற எண்ணம் தான் பெரும்பாலான நடிகர்கள் மனதில் இருக்கிறது. ஏனென்றால் இம்மாதிரியான கிராமப்படங்களில் நாடகத்தனம், செண்டிமெண்ட் வசனங்கள், டிபிக்கல் சண்டைக்காட்சிகள் என பல வருடங்களாய் இருக்கும் டெம்ப்ளேட் க்ளீஷே காட்சிகள் நிரம்பியிருக்கும். அதை ட்ரெண்டி பார்வையாளர்கள் கழுவி ஊற்றுவார்கள். ஆனால் அதே படங்கள் தான் சாதாரண பார்வையாளனுக்குள் ஒர் தொடர்பை ஏற்படுத்துகிறது. ஆனால் இம்மாதிரியான படங்களில் நடிக்க ஆரம்பித்தால் அது ஓடாது. கொஞ்சம் வெற்றி கொடுத்திருக்க வேண்டும். மக்களின் முகம் தெரிந்தவனாக  இருக்க வேண்டும் அப்படியான நடிகர் தான் இம்மாதிரியான படங்களை பார்க்க தியேட்டருக்கு வருவார்கள் மக்கள். இது தெரியாமல் ஒர் புது முக நடிகன் இம்மாதிரியனா பி & சி படங்களில் நடித்தால் வெற்றியடைவது கொஞ்சம் கஷ்டமே.

சென்ற வாரம் வெளியான இரண்டு படங்களுமே தியேட்டருக்கு வராத மக்களை மீண்டும் அழைத்து வந்திருக்கிறது என்கிறார்கள். தமிழ்படம் எல்லா வயதினரையும் இழுந்து வந்துருக்க, முதல் நாள் வசூல் மட்டுமே 3 கோடியை தாண்டியிருக்கிறது. உடன் வந்த கடைக்குட்டி சிங்கம் மெல்ல பிக்கப் ஆகி, இன்று தமிழ், தெலுங்கு என இரண்டு மொழிகளிலும் வெற்றியை தாண்டியிருக்கிறது. குறிப்பாய் முன்பு கொம்பன் படம் வந்த போது பல ஊர்களில் மக்கள் கூட்டமாய் வண்டி கட்டிக் கொண்டு வந்தார்கள் என்ற பேச்சு இருந்தது. அது போல பேமிலி கூட்டம் நன்றாகவே இருப்பதாய் தகவல். என்னதான் பெரிதாய் ஹிட் என்றாலும் திங்கட்கிழமை அன்று தான் படங்களில் ஒரிஜினல் நிலை தெரியும். அந்த வகையில் பார்த்தால் திங்கட்கிழமை மதியக் காட்சிக்கு சென்னையில் உள்ள ஒர் மல்ட்டி ப்ளெக்ஸில் சுமார் ஐம்பது சதவிகிதம் ஆடியன்ஸ் கடைக்குட்டி சிங்கத்துக்கு வந்திருந்தார்கள். படத்தின் வெற்றியை இது பறை சாற்றுகிறது.

தெலுங்கில் இம்மாதிரியான பேமிலி செண்டிமெண்ட் படங்கள் பெரும் வரவேற்பை பெரும் விஷயம். கூட்டு குடும்பம், விவசாயம், ஒவ்வொரு வளரும் ஹீரோவும் இம்மாதிரியான செண்டிமெண்ட் பி செண்டர் படங்களில் நடித்துவிடுவார்கள். ஏனென்றால் அம்மாதிரியான படங்களின் வெற்றி அவர்களை இன்னமும் நெருக்கமாய் மக்களிடையே கொண்டு போய் சேர்க்கும் என்பதால். சதமானம் பவதி ஒர் ஹிட் என்றால் சமீபத்தில் வெளியாகி சக்கை போடு போட்ட “ரங்கஸ்தலத்தின் வெற்றி அதை விட பெரியது. வசூலில் மட்டுமில்லாமல் ராம் சரணை ஒர் நல்ல நடிகனாகவும் வெளியே தெரிய வைத்தது.

வியாபாரமாய் வந்த ரெண்டு படங்களும் பெரும் ஹிட் என்பது தமிழ் சினிமாவுக்கு நல்ல விஷயம் தான். இரும்புத்திரை, டிக் டிக் டிக், தமிழ் படம்2, கடைக்குட்டி சிங்கம் என திரும்பவும் மக்கள் தியேட்டர் நோக்கி வரவழைத்திருக்கிறார்கள். இதை சாக்காய் வைத்து மீண்டும் அவர்களின் டவுசர் அவிழ்க்க முயலாமல், ஆன்லைன் டிக்கெட் கொள்ளை, பார்க்கிங் கொள்ளை, ஸ்நாக்ஸ் கொள்ளைகளை விட்டால் தமிழ் சினிமா உயிர்த்தெழும்.



Feb 27, 2019

Sacred Games - Web Series

Sacred Games
சினிமா அவ்வளவுதான் இனிமே. எல்லாரும் டிவி பார்க்க போயிட்டாங்கனு சொல்லிக் கொண்டிருந்த போதும், சிடி, டிவிடி, டவுன்லோட் காலம் என ஒவ்வொரு ப்ரீயட் வரும் போதும் அவ்வளவுதான் சினிமா என்பார்கள். ஆனால் சினிமா எனும் ராட்ஷனுக்கு அழிவே கிடையாது. எதாவது ஒரு வழியில் மீண்டும் மீண்டும் தன்னை புதுப்பித்துக் கொண்டேயிருப்பவன். 

அது வெளிப்படும் டெக்னாலஜி வேண்டுமானால் மாறுமே தவிர சினிமா மாறுவதேயில்லை. 2010 நான் சினிமா வியாபாரம் புத்தகத்தில் இன்னும் பத்து வருடங்களில் நாம் சினிமாவை வீட்டில் தான் பார்க்கப் போகிறோம், அதுவும் இண்டர்நெட் வழியாய் என்று எழுதியிருந்தேன். அது ஆறு வருடங்களுக்குள்ளேயே நடக்க ஆரம்பித்துவிட்டது.

பெரிய திரைகளில் சூப்பர் ஹீரோ படங்களும், வீட்டின் டீவியில் மொக்கை சீரியல்களும் ஓடிக் கொண்டிருந்த நேரத்தில் வெப் சீரீஸ் எனும் புதிய சீரியல் வடிவம். சினிமாவுக்கு சற்றும் குறையாத வகையில், அதே பிரம்மாண்டத்தோடு விதவிதமான கதைக்களன்களில், மிகச் சிறந்த நடிகர்களோடு, டெக்னீஷியன்களோடும், ஹாலிவுட்டில் களமிறங்க ஆரம்பிக்க. நாமெல்லாம் நெட்ப்ள்க்ஸிலும், அமேசானிலும் ஆவென வாய் பிளந்து பார்த்துக் கொண்டிருந்தோம். நம்மூர்ல அந்த தரத்தோடு சீரிஸ் எல்லாம் வருமா? என்று. அதை அமேசானின் இன்சைட் எண்ட்ஜ் மூலம் கணக்கை தொடங்கினார்கள். இப்போது நெட்ப்ளிக்ஸ் தன் பலத்தை, அனுராக் காஷ்யப், விக்ரமாதித்ய மோத்வானி, நவாசுதீன் சித்திக், சாயிப் அலிகான், ராதிகா ஆப்தே.. விக்ரம் சந்திராவின் நாவலை சீரீஸ் ஆக்கியிருக்கிறார்கள்.

சர்டஜ் சிங். நேர்மையான போலீஸ் ஆபீஸர். ஆயுதமில்லாமல் சரணடைய வந்த ஒர் அக்யூஸ்டை சுட்டதற்காக கமிஷன் முன்பு உண்மை சொல்ல விழைபவன். ஆன்ஸைட்டி ப்ரச்சனை, டைவர்ஸ் என கிட்டத்தட்ட தன்னை நிலைநிறுத்திக் கொள்ள முடியாமல் அலைபவன். அவனை 16 வருடங்களாய் கண் காணாமல் இருக்கும் மும்பையின் டான் கணேஷ் கைக்கோண்டே அழைக்கிறான். மும்பை இன்னும் 25 நாட்களில் மொத்தமாய் அழியப் போகிறது. அனைவரும் சாகப் போகிறார்கள். திரிவேதியை தவிர என்கிறான். மேலும் தகவல்களை கேட்க அணுகுவதற்குள் கணேஷ் கைக்கோண்டே தற்கொலை செய்து கொள்கிறான். மும்பைக்கு என்ன ஆகப் போகிறது? யார் இந்த கணேஷ் கைக்கோண்டே, ரா, லோக்கல் அரசியல்வாதிகள் ஏன் இந்த பிரச்சனையில் இவ்வளவு ஆர்வர்ம் காட்டுகிறார்கள். எதிரிகள் ஒவ்வொருவராக கொல்லப்பட, மும்பை எப்படி காப்பாற்றப்படப் போகிறது என்பதை எட்டு நாற்பத்தைந்து நிமிஷ எபிசோடாக சொல்லியிருக்கிறார்கள்.

சூத்தியா, காண்ட் என ஹிந்தி, மராத்தியில் இருக்கும் அத்தனை கெட்ட வார்த்தைகளை மிகச் சாதாரணமாய் பயன்படுத்தியிருக்கிறார்கள். ஏகப்பட்ட நிர்வாணக்காட்சிகள், உடலுறவு காட்சிகள் என, இந்திய சினிமாவில் சென்சாருடன் போராடினால் கூட வைக்க வாய்ப்பில்லாத பல விஷயங்கள் இந்த சீரீஸில் சாத்தியமாகியிருக்கிறது.

கணேஷ் கைக்கோண்டேவாக நவாசூதீன் சித்திக். மனுஷனுக்கு எங்கே நடிக்கிறார்?. அவ்வளவு கேஷுவல். ஆனால் கணேஷ் ஏன் இப்படி ஆனான் என்று ஆரம்பித்து அவன் தாதாவாக வரும் அத்தனை காட்சிகளும் காட்பாதரில் ஆரம்பித்து, நம்மூர் நாயகன் வரை சலிக்க, சலிக்க பார்த்த விஷயங்கள் தான் என்றாலும் அனுராக்கின் கைவண்ணம் நம்மை கட்டிப் போடுகிறது.   சீரீஸ் நெடுக நவாசூதீன் பேசும் வசனங்களில் ஏகப்பட்ட சர்க்காஸம். சீரீஸின் தலைப்பைப் போலவே

மொத்தம் 190 நாடுகளில் ஒரே நேரத்தில் பார்க்ககூடிய வகையில் இந்தியாவில் நெட்ப்ளிக்ஸ் தயாரித்திருக்கும் முதல் சீரீஸ். ஒர் கமர்ஷியல் படத்துக்கு கொடுக்கப்படும் அத்துனை விளம்பர முக்யத்துவமும் இதற்கும் கொடுத்து களமிறக்கியிருக்கிறது நெட்ப்ளிக்ஸ்.

இந்த சீரீஸ் மூலம் நிறைய அரசியல் பேசியிருக்கிறார்கள். எமர்ஜென்சி, இந்திராகாந்தி, ராஜீவ்காந்தி, காங்கிரஸ், மும்பை குண்டு வெடிப்பு, பாப்ரி மஸ்ஜித் என ஒவ்வொரு காலகட்டதையும் கதையோடு இணைத்து பேசுகிறார்கள்.

உண்மையில் சொல்லப் போனால் இந்த சீரிஸ் இந்தியாவிலேயே மிகப்பெரிய வெற்றியை பெற்றிருக்கிறது என்பதை வரும் விமர்சனங்களை வைத்து புரிந்து கொள்ள முடியும். ஆனால் அதே நேரத்தில் நெட்ப்ளிக்ஸின் நார்கோஸ் போன்ற சீரீஸ்களை பார்த்தவர்களுக்கு இது ஓகே ரகமாய்த்தான் தெரியும். காரணம் நாம் ஏற்கன்வே பார்த்து பழக்கப்பட்ட காட்சிகளால்தான். ஆனால் அதே வேளையில் நார்கோஸ்  போன்ற சீரீஸ்கள் மூலமாய் அந்நாட்டு அரசியல், அதில் நடக்கும் ஊழல்கள், லோக்கல் பாலிட்டிக்ஸ். கலாச்சாரம் போன்றவற்றோடு பார்க்கும் போது சுவாரஸ்யத்துக்கு பஞ்சமிருக்காது.

இந்த சீரீஸை வெளிநாட்டினர் பார்க்கும் போது அதே உணர்வு நிச்சயம் அவர்களுக்கும் ஏற்படும். குறிப்பாய் இந்திய அரசியலில் நடந்த முக்கிய நிகழ்வுகளை வைத்து அமைத்திருக்கும் திரைக்கதை. அட்டகாசமான சர்காஸ்டிக் வசனங்கள். தரமான நடிப்பு. இந்த்ய படங்களில் இத்தனை தைரியமான காட்சிகளா? என்று ஆச்சர்யபடுத்த தவறாது.

இது அத்தனையும் சாத்தியமானதற்கான காரணம் நெட்ப்ளிக்ஸ், அதன் பட்ஜெட் . சுமார் ஆறு கோடி வரை ஒரு எபிசோடுக்கு செலவ் செய்திருப்பதாய் சொல்கிறார்கள்.  பின் ஏன் வராது தரம். நவாசூதீன் சித்திக்கின் எபிசோடை அனுராக் தான் இயக்கியிருக்கிறார் என்று சொல்லாமலேயே புரிகிறது. அவரது முந்தைய படங்களின் சாயல் இக்காட்சிகளில் இருந்தாலும் பம்பாய் வெல்வெட் படத்தில் வரும் பழைய மும்பை. காபரே லோக்கல் தாதா வளரும் காட்சிகள் எல்லாம் தரமோ தரம்.

இந்திய அளவில் இந்த சீரீஸ் ஒர் பெரிய மைல் கல். ஆனால் அதே நேரத்தில் போலியான மறு உருவாக்கமாகவும் தெரிகிறது. சாக்ரெட் கேம்ஸின் வெற்றி மேலும் பல சிறந்த கலைஞர்களின் சுதந்திர களங்களை, படைப்புகளை வெளிக்கொணர நெட்ப்ளிக்ஸ் வழி வகுத்திருக்கிறது என்றே சொல்ல வேண்டும்.

Feb 20, 2019

Glitch – உயிர்தெழுதல்- web series review

Glitch – உயிர்தெழுதல்
சினிமாவில் சொன்னால் நம்ப முடியாத சில கதைகளை சீரீஸில் சொன்னால் சுவாரஸ்யப்படுத்திவிட முடியும். அதிலும் குறிப்பாக அமானுஷ்ய கதைகள். அம்மாதிரியான கதைகளுக்கு பஞ்சமே இல்லாமல் இருக்குமிடம் வெப் சீரீஸ்கள். சமீபத்தில் பார்த்த நெட்ப்ளிக்ஸ் சீரிஸான “க்ளிட்ஜ்” கதை படு சுவாரஸ்யம்.

முதல் எபிசோடிலேயே நம்ம கட்டிப் போட ஆரம்பித்துவிட்டது. ஒரு சுடுகாடு. நடு ராத்திரி. கல்லரை ஒவ்வொன்றாய் விரிசல் கொண்டு பிளக்க ஆரம்பிக்கிறது. மெல்ல அதிலிருந்து நிர்வாணமான மனிதர்கள் வெளியே வருகிறார்கள். வந்தவர்கள் உடல் முழுவதும் மண் அப்பியிருக்க, ஒன்றும் புரியாமல் என்ன செய்வது என்று தெரியாமல் ஆளாளுக்கு மலங்க, மலங்க விழித்துக் கொண்டிருக்கிறார்கள். இதைப் பார்த்த சிறுவன் ஒருவன் அதை படம் பிடிக்கிறான். போலீஸுக்கு தகவல் சொல்கிறான். அங்கு வரும் போலீஸ் இவர்கள் எல்லாரும் யார் என்ன என்று விசாரிக்க, அவர்களால் ஏதும் பதில் சொல்ல முடியவில்லை. அனைவருக்குமான முதல் உதவிகளை செய்ய அருகில் உள்ள லோக்கல் கவர்மெண்ட் ஆஸ்பிட்டலுக்கு அழைத்துச் செல்கிறான் போலீஸ் அதிகாரியான ஜார்ஜ்.

அனைவரையும் அழைத்துப் போய் ஆஸ்பிட்டலில் செக் செய்யும் போதுதான் தெரிகிறது அனைவரும் இறந்தவர்கள் என்று. அதுவும் ஒவ்வொரு காலகட்டத்தில் அந்த கூட்டத்தில் போலீஸ் அதிகாரியான ஜார்ஜின் மனைவி எம்மாவும் இருக்க, அதிர்ச்சியாகிறான். கேன்சரினால் அவள் இறந்து இரண்டு ஆண்டுகள் ஆகி, வேறொரு பெண்ணை திருமணம் செய்து அவள் கர்பமாக இருக்கும் சூழ்நிலையில் மனைவி உயிருடன் வந்ததைப் பற்றி சந்தோஷப்படுவதா, இல்லை கலவரமடைவதா என்று குழம்பித் தவிக்கிறான்.

வந்தவர்களில் ஒருத்திக்கு தான் கொல்லப்பட்டது மட்டுமே நியாபகம் இருக்கிறது. இருபது வருடங்களுக்கு முன் இறந்திருக்க, அதன் நியாபகம் வர, வர, அதை நோக்கி போகிறாள். இன்னொருத்தி அழகிய குடும்பத்தலைவி. தன் கணவனின் அடி தடி எல்லாவற்றையும் தாண்டி தன் அழகு பெண் குழந்தையையும் குடும்பத்தையும் நேசிப்பவள் நாற்பது ஐம்பது வருடத்துக்கு முன் இறந்தவள். அவள்தன் குடும்பத்தை தேட ஆரமிக்கிறாள். இன்னொருவனுக்கு ஆங்கிலமே தெரியவில்லை. இத்தாலி மொழி பேசுகிறான். எழுபது என்பது வருடங்களுக்கு முன் இறந்தவன். டேட்டாபேஸை வைத்து அவனின் அண்ணன் ஒருவர் இன்னமும் ஊரின் எல்லையில் வாழ்ந்து கொண்டிருப்பதாய் தெரிய வர, அவனை அங்கு அழைத்துப் போனால் எப்படி இவன் இறந்தான் என்றும், இவன் மீண்டும் எப்படி உயிர்பெற்று வரக்காரணம் ஏதுவாய் இருக்குமென்று நினைத்து அவனை அழைத்துப் போகிறான் ஜார்ஜ். ஆனா ஊர் எல்லையில் உள்ள ஒரு பாலத்தை தாண்டும் முன்பு அவன் எரிந்து பஸ்மமாகிறான்.

இப்படி உயிர் பிழைத்த எல்லாரையும் வெளியுலகத்திற்கு தெரியாமல் ஹாஸ்பிட்டலிலேயே தங்க வைத்து அவர்களின் உயிர்தெழுதலின் காரணத்தை கண்டு பிடிக்க, உத்வுகிறாள் டாக்டர் எலிஷா. அதே நேரத்தில் ஜார்ஜின் நடவடிக்கைகளில் சந்தேகம் கொண்ட உடன் வேலை செய்யும் போலீஸ் ஆபீஸர் தனியாய் விசாரணை செய்ய முயல, அவன் ஒரு விபத்தில் இறக்கிறான். இறந்தவன் உடனடியாய் உயிர் பெற்று, தான் ஏன் உயிர் பெற்றோம் என்று காரணத்தை தேடியலைகிறவர்களை கொல்ல ஆரம்பிக்கிறான்.

ஜார்ஜிடம் மாட்டாத இன்னொரு மனிதனும் ஊருக்குள் புகுந்து விடுகிறான். அவன் தன்னுடய சிலையை பார்க்கிறான். நூறு வருடங்களுக்கு முன் தான் தான் அந்த நகரின் மேயர் என்று எழுதியிருக்க, அவனை பாலோ செய்யும் சிறுவன் அவனுக்கு உதவுகிறான். தான் எப்படி உயிருடன் வந்தேன் என்று புரியாமல் காரணத்தை  தேட ஆரம்பிக்கிறார். அப்படி தேடும் போது கிடைக்கும் அனுபவங்களில் அவருக்கு தெரிய வரும் விஷயம் ஆச்சர்யமான ஒன்று. தான் இயல்பாய் சாகவில்லை என்பதும், தன்னை கொன்றது தன் குடும்பமே என்று அறிகிறார். ஏன் கொன்றார்கள் என்று தேடும் போதுதான் புரிகிறது. அவருக்கும் அவருடய வேலையாளான ஒரு கறுப்பின பெண்ணுக்குமிடையே ஆன உறவும், காதலும். அதனால் அவள் கர்பமாக இருக்க, சொத்துக்கு பிரச்சனை வருமென்று தகப்பனையே கொன்று புதைத்திருக்கிறார்கள் என்று புரிபடுகிறது. உதவும் சிறுவன் தான் தன் பேரன் என்று புரிந்து கொண்டு சொத்தை கைப்பற்றி பேரனுக்கு கொடுக்க் நினைக்கிறார்.

இவர்கள் எல்லோரும் ஊரை விட்டு வெளியே போக முடியாது. போக நினைத்தால் எல்லா தாண்டியதும் பஸ்மமாகி விட வேண்டியதுதான். இவர்களுக்கு என்று ஸ்பெஷல் பவர் ஏதும் கிடையாது. சாதாரன மனிதர்களுக்கு இருக்கும் அதே சக்தி மட்டுமே. தாங்கள் ஏன் உயிர் பெற்றோம். தங்கள் சாவுக்கான காரணம். தன் மரணத்திற்கு பிறகு உடனிருந்தவர்களின் இயல்பு வாழ்க்கை வாழ்வதை ஏற்றுக் கொள்ள முடியாமை. அதற்கு எதிர் நடவடிக்கைகள். இயற்கைக்கு மாறாய் நடக்கும் விஷயங்களை அழிக்க உருவாகும் வில்லன். என செம்ம எமோஷனல் சீரீஸ்.
இப்படியாக எப்படி சாத்தியம் என்பதற்கு இவர்கள் இக்கதையில் கொடுத்திருக்கும் விளக்கம் கொஞ்சம் டகால்டியாயிருந்தாலும், சீரீஸ் நெடுக கொடுக்கப்படும் திருப்பங்கள், கதை சொல்லும் முறை எல்லாமே சுவாரஸ்யம். வாய்ப்பிருப்பவர்கள் பார்க்கக் கடவது. இல்லையேல் உயிர்தெழுவிக்க படுவீர்கள் 


Feb 16, 2019

Sammohanam

Sammohanam
ரெண்டு ரீலுக்கு ஒரு பாட்டு, எந்தவிதமான மனநிலையில் ஹீரோ இருந்தாலும், ஹீரோயினின் அம்மாவோ, அல்லது மாமனாரோ அவங்க ரெண்டு பேரும் மழையில ஜாலியா குத்து பாட்டு பாடுவாங்களோ என்று கற்பனையிலாவது கடைசி ரீலுக்கு முன் ஒரு குத்துப் பாட்டை போட்டு நம்மை ஜெர்க்காக்கி உட்கார வைக்கும் தெலுங்கு சினிமாவில் அவ்வவ்ப்போது தென்றலாய் படங்கள் வருவதுண்டு. அதில் முக்கியமானவர் சேகர் கம்மூலா.

இவரது முதல் படமான டாலர் ட்ரீம்ஸில் ஆரம்பித்து, ஆனந்த், கோதாவரி, ஹாப்பி டேஸ், சமிபத்திய ஃபிடா வரைக்கும் என சொல்லலாம்.  அதே நேரத்தில் ஆங்காங்கே சின்னச் சின்ன பட்ஜெடுகளில் ஃபீல் குட் படங்களை கொடுத்துக் கொண்டிருக்கும் இன்னொரு முக்கிய இயக்குனர் மோகனகிருஷ்ணா இந்திராகாந்தி. இவரது முதல் படமான கிரகணம் தேசிய விருது பெற்ற படம். அதன் பிறகு இவர் எடுத்த படங்களில் அஸ்தா சம்மா, கோல்கொண்டா ஹைஸ்கூல், அந்தாக்க முந்து ஆ தரவாத்தா, ஜெண்டில்மேன், அமிதுமி போன்ற படங்கள் கிரிட்டிக்கலாகவும், வசூல் ரீதியாகவும் வெற்றிப் படங்களே. மினிமம் கேரண்டி காதல் கதை. அதில் கொஞ்சம் நகைச்சுவை, நல்ல எமோஷன் என கலவையாய் அமையப் பெற்ற படங்கள். இவரது புதிய படமான சம்மோகனமும், அந்த லிஸ்ட் தான்.

ஹூயூக்கிராண்ட், ஜூலியா ராபர்ட்ஸ் நடித்த “நாட்டிங்ஹில்” படத்தை லேசாய் தழுவியபடம் என்றாலும், ப்ரசெண்ட் பண்ண விதம் ஆஸம். சுதிர்பாபு ஒரு ஆர்டிஸ்ட். குழந்தைகளுக்கான அனிமேசனில் தான் ஆர்வம். நல்ல அப்பா, அம்மா, தங்கை என அருமையான குடும்பம். அவர் வீட்டை சினிமா ஷூட்டிங்கிற்கு கேட்கிறார்கள். தன்னையும் ஒரு கேரக்டர் ரோலில் நடிக்க ஒத்துக் கொண்டால் வீடு தருகிறேன் என்கிறார் சினிமா ஆர்வலரான சுதிர்பாபுவின் தந்தை நரேஷ். பிரபல ஹீரோயின் சமீரா நடிக்கிறார் என்றதும், ஊரே ஆர்வமாயிருக்க, சுதிர் மட்டும் பெரிய சுவாரஸ்யம் காட்டவில்லை. சமீரா டயலாக் பேசும் கொச்சை தெலுங்கை கிண்டல் செய்ய, தன் தெலுங்கை சரி செய்து கொள்ள சுதிரையே வசனம் சொல்லித்தருமாறு பணிக்கிறாள். இருவருக்கிடையே ஆன நெருக்கம் வளர்கிறது. ஒர் மழை நாளில் சுதிர்பாபு வீட்டில் தங்க வேண்டிய கட்டாயத்தில் இருவருக்கிடையே ஆன நெருக்கம் அதிகமாகி, விலகுகிறார்கள். தன் காதலை சொல்லப் போன சுதிரை அவள் மறுக்கிறாள். பின்பு என்ன ஆனதுதான் கதை.

சிம்பிளான லைன். அதை அழகாய், அழுத்தமாய் மாற்றியது இயல்பான திரைக்கதை. வசனம். அண்ட் இயக்கம். காதல் மறுதலித்த சோகத்தில் மகன். தான் நடித்த படத்தின் தன் காட்சிகள் அனைத்தும் வெட்டப்பட்ட விஷயம் தெரிந்து நொந்து போயிருக்கும் கணவன், அண்ணன் தங்கைக்குள்ளான சண்டையில் முறுக்கிக் கொண்டிருக்கும் தங்கை என ஆளாளுக்கு தனித்தனியாய் இருக்க, மகனுக்கு காப்பி எடுத்துக் கொண்டு வந்த அம்மா “எல்லாரும் மூட் அவுட் ஆகி ஒவ்வொரு ரூமுல இருக்க, நான் மட்டும்தான் சந்தோஷமா ரூமுக்கு ரூம் சர்வ் பண்ணிட்டிருக்கேன்” என்று ஆரம்பித்து மகனுக்கு ஆறுதல் சொல்லும் காட்சியில் அவர் பேசும் வசனங்களும், அதை சுதிர் பாபு எதிர்கொள்ளும் விதமும், அவ்வளவு இயல்பு.

மொட்டை மாடியில் சுதிர்பாபுவும், அதிதியும் பேசும் காட்சி லைட்டான ஹைக்கூ. அக்காட்சியில் வரும் க்ளேசப் வசனங்கள் அட்டகாசம். அதற்கு பின்னணியாய் உறுத்தாத இசை இன்னும் சூப்பர்.


அனுபமா கிருஷ்ணமூர்த்தி, நரேஷ் என அனுபவமிக்க நடிகர்களின் இயல்பான பங்களிப்பு. அதிதி ராவின் பேசும் கண்கள். ரொம்பவுமே அடக்கி வாசிக்கப்பட்ட அண்டர்ப்ளே சுதிர்பாபு, அவ்வப்போது மனசாட்சியாய் அறிக்கைவிட்டுப் போகும் அவரின் நண்பர் ராகுல் ராமகிருஷ்ணா என நல்ல நடிகர் பட்டாளம். மிக இயல்பான வசனங்கள். உறுத்தாத பிண்ணனி இசை, இரைச்சல் இல்லாத விவேக்கின் இசை. அதீத க்ளோசப்களில் கூட கவிதையாய் வண்ணம் இழைக்கும் பி.சி.விந்தாவின் ஒளிப்பதிவு, படம் நெடுக இழையோடும் இயல்பான நகைச்சுவை போன்ற பல ப்ளஸ்கள் இருந்தாலும், நாடகத்தனமான நரேஷின் கேரக்டர். சினிமா காட்சிகள். ஹாலிவுட் டெம்ப்ளேட் க்ளைமேக்ஸ் போன்றவை லேசான உறுத்தல்தான். பட். .ரொம்ப நாள் கழித்து ஒரு நல்ல பீல் குட் படம் பார்த்த திருப்தி. 

Feb 12, 2019

Lust Stories

Lust Stories
செக்ஸுவல் உணர்வு சார்ந்த கதைகளை தமிழில் எடுத்தால் பெரும்பாலும் ஹிப்போக்கிரேட் ஷோஷியல் மீடியா சூழ் உலகில் அவைகளை பிட்டுப்படங்களாய் மட்டுமே பார்ப்பார்கள். ஆனால் அதே நேரத்தில் உலக சினிமாவென்றால் அதே பிட்டுக் காட்சிகள் பிரஸ்தாபிக்கப்படும். இந்தியாவின் பெரும் மக்கள் தொகையை டார்கெட் செய்து இரண்டு வெளிநாட்டு ஓ.டி.டி ப்ளாட்பார்ம்களான நெட்ப்ளிக்ஸும், அமேசானும்  தங்களது கண்டெண்டுகளால் இறங்கி அடிக்க ஆரம்பித்திருக்கிறது.

பெரிய நடிகர்கள் ஃபீல் குட் படங்களில் நடிப்பதில்லை. சிறிய நடிகர்கள் நடித்த ஃபீல் குட் படங்கள் ஓடுவதில்லை. ரெண்டும் கெட்டான் நிலையில் இருக்கும் இந்திய சினிமாவுக்கு இந்த ப்ளாட்பார்மகள் பெரும் வரப்பிரசாதம். லவ் பர் ஸ்கொயர் ஃபீட், போன்ற படங்கள் மூலம் நெட்ப்ளிக்ஸ் ஒரிஜினல் படங்கள் சீரீஸை ஆரம்பித்திருக்க, இன்னொரு பக்கம் அமேசான், தமிழ், தெலுங்கு நடிகர்களை வைத்து கிட்டட்தட்ட மசாலா படம் லெவலுக்கு படங்களையும் சீரீஸ்களையும் இறக்குகிறது.

நெட்ப்ளிக்ஸ் தேர்ந்த கலைஞர்களுடன் கைகோர்த்து சமீபத்தில் அளித்திருக்கும் ஒரிஜினல் படம் தான் இந்த “லஸ்ட் ஸ்டோரீஸ்”. காமம் சார்ந்த கதைகள். அனுராக் காஷ்யப், ஜோயா அக்தர், திபங்கர் பனர்ஜி, கடேசியாய் கரன் ஜோஹர் ஆகிய நால்வரும் இயக்கிய நான்கு காமம், வாழ்க்கை சார்ந்த படங்கள் வரிசைக் கட்டியிருக்கிறது.

அனுராக்கின் படம் வழக்கம் போல கொஞ்சம் மனோதத்துவம் சார்ந்து, உறவுகளில் உள்ள சிக்கல், அதுவும் டீச்சர், மாணவனிடையே உருவான செக்ஸுவல் உறவு. அதன் சார்ப்பாய் எழும் மனவெழுச்சி ப்ரச்சனைகள், கொஞ்சம் டாக்குமெண்டரித்தனமாகவும், அதே நேரத்தில் சுவாரஸ்யமாகவும் கையாண்ட கதை. க்ளைமேக்ஸ் ட்விஸ்ட் நச். வசனங்களும், ராதிகா ஆஃப்தேவின் நடிப்பும் வழக்கம் போல் ஆசம்.

ஜோயா அக்தரின் படம் ஆரம்பிக்கும் போதே தீயாய் ஒரு உடலுறவில் ஆரம்பிக்கிறது. வீட்டு வேலைக்காரிக்கும், முதலாளி இளைஞனுக்குமிடையே நடக்கிறது. நெருக்கமாய் பேசிக் கொள்கிறார்கள். சில நாட்கள் பிறகு அவனுடய பெற்றோர்கள் வருகிறார்கள். ஒழுக்கமான பையனாய் தன்னை வெளிப்படுத்திக் கொள்கிறான். அவனுக்கு பெண் பார்க்கிறார்கள். அவளுடனான தனிப் பேச்சு அந்த வீட்டிலேயே நடக்கிறது. வேலைக்காரியின் மனம் படும் அவதிதான் படம். அவளுக்கு தெரியும் அவனை அடைய முடியாது என்று. நெருக்கமும், காமமும், கொடுத்த உறவு அதை இழக்க விரும்பாது அலைபாய்கிறது. அதிலிருந்து எப்படி வெளி வருகிறாள் என்பதுதான் இவரது கதை. பூமிபட்னெகரின் நடிப்பு சிறப்பு.

திபங்கர் பேனர்ஜியின் கதை ரொம்பவே மெச்சூர்ட். இரண்டு குழந்தைகளுக்கு தாயான மனிஷா கொய்ராஜா. ஸ்விம் ஸூட்டில் பீச்சில் குளித்து எழுந்து கரையில் காத்திருப்பவரிடம் நான் எப்படி இருக்கிறேன் என்று கேட்கிறார். இரண்டு குழந்தைகளுக்கு அம்மா போல என்கிறார் இவர். கரையில் இருப்பவர் அவளது கணவனில்லை. கணவனின் நண்பன். இவளுக்கு கல்லூரி நண்பன். கல்லூரி காலத்தில் இவள் மேல் காதல் கொண்டிருந்து வெளியே சொல்லாதவன். சொல்லிய சல்மானுக்கு மனைவியாகி, ரெண்டு குழந்தைகளுக்கு தாயாகி, குடும்ப வாழ்க்கையில் தன்னிறைவு இல்லாமல், தனக்கென அடையாளம் இல்லாமல், ஆணாதிக்க அழுத்தத்தில் வாழ்கிறவள். பழைய நண்பனான சுதிருடன் உறவு. அது அவளது கணவனுக்கு சந்தேகத்தை வரவழைக்க, இதை சரி செய்ய அவனையும், சுதிருடன் இருக்கும் பீச் ஹவுஸுக்கு அழைக்கிறாள். தனக்கும் சுதீருக்குமிடையே ஆன உறவை சொல்லுகிறாள் பின்பு என்ன நடந்தது என்பது கதை. மிக அழகாய் இக்கதையை கையாண்டிருக்கிறார் இயக்குனர் திபங்கர் பேனர்ஜி.  மனிஷாவின் க்ளைமேக்ஸ் ரியாக்‌ஷன் ஒன்று போதும் அவரது நடிப்பை பற்றி சிலாகிக்க. கார்பரேட் மனிதர்களின் காமம்.

மொத்த படத்திலேயே கொஞ்சம் நகைச்சுவையோடு சொல்லப்பட்ட சீரியஸ் கதை கரண் ஜோகரின் கதை தான். திருமணம் என்பது குழந்தைப் பிறப்புக்கு மட்டுமே என்ற குடும்பத்தில் பெண்ணின் செக்ஸுவல் ஆசை என்பது மறுத்தளிக்கப்படுகிற நிலையில். அவள் தோழியின் வைப்பரேட்டரை நாடுகிறாள். நாடிய அந்த நாளில் நடக்கும் விஷயங்கள் கொஞ்சம் மிகைப்படுத்தப்பட்ட நகைச்சுவையாய் இருந்தாலும், செம்ம இண்ட்ரஸ்டிங்.
இந்த நான்கு கதைகளும் பெண், அவளின் தேவை, அவளது காமம் சார்ந்த தேடல். அதன் சார்ந்த பிரச்சனைகள். இதை அணுகும் ஆண்களின் மனப்பான்மை. ஏன் பெண்களின் மனப்பான்மை கூட பேசுகிறது. என்ன எல்லாவற்றையும் மேலோட்டமாய் பேசுகிறது. சென்ஸார் உள்ள சினிமாவில் கூட புரட்சியாய் காட்சி வைப்பவர்கள் இதில் கொஞ்சம் அடக்கி வாசித்திருக்கிறார்கள் என்றே சொல்ல வேண்டும். இன்னும் கொஞ்சம் ஆழமாய் பேசியிருக்கலாம். படமாக்கியிருக்கலாம். பட்.. நல்ல முயற்சி. இவைகள் தமிழில் வருவது எப்போது என்று வழக்கம் போல காத்திருப்போம்.