தொட்டால் தொடரும் - தமன்
தொட்டால் தொடரும் படத்தின் கதாநாயகன் தேடல் நடந்து கொண்டிருந்த நேரம். பெரிய நடிகர்கள் முதல் ரெண்டொரு படங்கள் நடித்த நடிகர்கள் வரை பார்த்துக் கொண்டிருந்தோம். பெரிய ஹீரோக்களின் டேட்டும் சம்பளமும் பட்ஜெட்டுக்கு மேல் போக, அப் கம்மிங் ஹீரோக்களை பார்க்கலாம் என்று அலசிக் கொண்டிருந்த போது சட்டென என் மனதில் வந்தவர் இவர். மூன்று படங்களில் நடித்திருந்தார். இவரின் நடித்த முதல் படத்தில் இவரது நடிப்பு எனக்கு மிகவும் பிடித்திருந்தது. அடுத்த படம் பெரிய இயக்குனரின் படமாய் அமைந்தும் சரியாக போகவில்லை. மூன்றாவது படமும் அப்படியே. ஆனால் அவரிடம் ஒரு ஸ்பார்க் இருக்கிறது என்பது மட்டும் என் மனதில் தோன்றிக் கொண்டேயிருந்தது. நண்பர் ஒருவர் மூலமாய் அவரைத் தொடர்பு கொண்டு அலுவலகத்திற்கு வர முடியுமா? என்றதும் நேரில் வந்து சந்தித்தார். மிகவும் ஹம்பிளாய், சாப்ட் ஸ்போக்கனாய் இருந்தார்.