குங்குமபூவும் கொஞ்சும் புறாவும் - திரைவிமர்சனம்

காதல், சுப்ரமணியபுரம், வெண்ணிலா கபடி குழு, போன்ற படங்களின் லைவான திரைக்கதை அமைப்பு இயல்பாகவே அந்த படங்களுக்கு  அமைந்தது. அந்த இயல்பு இல்லாமல் வலுக்கட்டாயமாய் திணித்தால், நம்மால் உட்காரமுடியாது.  அதுமட்டுமில்லாமல் நிஜ வாழ்க்கை பல சமயங்களில் சினிமாவை போல டிவிஸ்ட் அண்ட் டர்ன்களூடன் இருப்பதில்லை. அதே போல்தான் குங்குமபூவும் கொஞ்சும்புறாவும்.

தன் தாய் தந்தையரால் அநாதரவாய் விடப்பட்ட துளசி தன் பாட்டியுடன் முட்டத்திற்கு வந்து சேருகிறாள். பக்கத்து வீட்டு இருக்கும் ஹீரோ ராம்கியுடன் பத்தாவது ஒன்றாய் படிக்க, அப்படியே ஒன்னாய் பள்ளியூடத்துக்கு போய் வந்து லவ் அடிக்கிறார்கள். காமெடி என்ற பெயரில் துளசியிடம் வயசுக்கு வர்றதுன்னா என்ன என்பது போன்ற சீன்கள்  எல்லாம் இருக்கிறது. உசிருக்கு உசிராய் காதலிக்கும் இருவரை பற்றி ஒரு வழியாய் இண்டர்வெல் நேரத்தில் ஹீரோவின் அம்மாவுக்கு தெரியவர, துளசியின் தலைமுடியை நறுக்கி அவமான படுத்தி, ஊரை விட்டே வெளியேற்றுகிறாள்.
ஸ்கூல் டூர் போய் திரும்பி வரும் ஹீரோ, அவளை தேடி ஓடி வர, ஆக்ஸிடெண்ட் ஆகி ஹாஸ்பிட்டலில் அட்மிட் ஆக, ஹீரோயினுக்கு வேறு இடத்தில்  தேவடியாள் என்று  ஊரறிந்தவளுடய தம்பிக்கு பாட்டி திருமணம் செய்து  வைத்துவிட, கடைசி நேரத்தில் சரியான நேரத்தில் வந்தும் ஏதும் செய்யாமல் போய்விடுகிறான் ஹீரோ. அதற்கு அப்புறம் என்னவானால் என்ன?. அதற்கப்புறம் நடப்பதெல்லாம் பழைய படங்கள் போல ஓரே சொதப்பல்.

ஹீரோயின் தர்ஷனாவின் கண்கள் காந்தம்,  ஹீரோ ராம்கி, கதையில் அவர்கள் சொல்லும் பத்தாவது படிக்கும் மாணவனின் கேரக்டருக்கும் சரியாக செட்டாகவில்லை. அவ்வப்போது சுப்ரமணியபுரம் ஜெய் போல அசடு வழிந்தப்டி தலையாட்டுகிறார். தண்ணியடிக்கிறார். அழுகிறார். செத்து போகிறார். படம் எந்த கால கட்டத்தில் நடைபெறுகிறது என்கிற குழப்பம் நிறைய இடங்களில் வருகிறது. பிண்ணனியில் போடப்படும் பாடல்களும், திருவிழாக்களில் காட்டப்படும் கரகாட்டகாரன்  திரைப்படமும் படத்தின் காட்சிகளும், வழக்கமாய் இம்மாதிரியான லைவ் படங்களில் ஒரு திருவிழா சீன் கண்டிப்பாய் இருக்க வேண்டும் என்கிற கட்டாய காட்சிகளும், குத்து பாட்டும் … ஏன் இந்த கொலைவெறி..?
 

படம் நெடுக பல கேரக்டர்கள், ஏதுவும் மனதில் நிற்க மாட்டேன் என்கிறது. துளசியை திருமணம் செய்யும் தர்மன் கேரக்டருக்கு ஏன் இவ்வளவு முக்கியத்துவம்? பார்க்க கஞ்சா கருப்பு போல காமெடி பார்டியார் உள்ள அவருக்கு ஒரு எஸ்.பி.பி பாட்டு வேற.  தாங்க முடியலடா சாமி. ஊரே தெரிந்து தேவடியா தொழில் செய்யும், ஒருத்தியின் வீட்டிற்கு போய் துளசியின் பாட்டி ஏன் அவளூடய தம்பிக்கு திருமணம் செய்ய ஒத்துக் கொள்ள வேண்டும்?. பிடிக்காத ஒருவனை திருமணம் செய்துவிட்டு, திடீரென நான் தர்மன் பொண்டாட்டி என்று தன் மச்சானில் கழுத்தில் அரிவாள்மனையை வைத்து மிரட்டும் அளவுக்கு தன் புருஷனை எவ்வாறு துளசி உணர்ந்தாள். க்ளைமாக்ஸில் பரோலில் வெளிவரும் போது,  கொலை செய்துவிட்டு வரும் துளசியின் புருஷனுக்கு பதிலாய் எதற்காக ஹீரோ கொலை பழியை ஏற்க வேண்டும், அப்படியே இருந்தாலும் அவன் ஒன்றும் கதையில் முக்கிய கதாபாத்திரம் கிடையாது. க்ளைமாக்ஸில் சாவதற்க்காவே உருவாக்கபட்டவன். அவனை ஹீரோ கொலை செய்துவிட்டான் என்று நினைத்து, தேவையேயில்லாமல் டயலாக்கில் ஜாதி  பிரச்சனையை சொல்லி ஹீரோவை எதற்காக  அடித்தே  கொல்ல வேண்டும்?  என்பது போன்ற கேள்விகள் பல படம் பூராவும்  வந்த வந்த வண்ணம் இருக்கிறது.

இரகசியம் சொல்வதாய் கிட்டே வந்து முத்தம் கொடுக்க முயற்சிக்கும் காட்சியில் கிட்டே வந்து நாக்கு  உலர்ந்து போய் கணக்கு புத்தகம் கேட்பதும்,  அதே டெக்னிக்கை துளசி ஹீரோ கூச்சாவிடம் பயன் படுத்தி முத்தமிடும் காட்சிகள் மயிலிறகு.

படத்தில் பாராட்ட பட வேண்டியவர் யுவன் சங்கர் ராஜா மூன்று பாடல்கள் அருமை. கேமராமேன் சித்தார்த் முட்டத்து அலைகளையும், அந்த கடலோரத்தையும் கண் முன்னே  நிறுத்தியிருக்கிறார் இருவரும் தங்கள் பங்கை உணர்ந்து செய்திருக்கிறார்கள்.
 

படத்தில் கூப்பிடும் போது பகலில் இருக்கும் கேரக்டர்கள், நடந்து அடுத்த தெருவில் வருவதற்குள் இரவாகி விடுகிறது. நடு இரவில் அடிவாங்க ஆரம்பிக்கும் ஹீரோ.. அடுத்த நாள் காலை வரை அடிவாங்கி கொண்டிருப்பதும், மத்யானம் ஹீரோயின் செத்ததும் சாவதும், இப்படி நிறைய இடங்களில் இம்மாதிரியான் குளறுபடிகள். முழுக்க, முழுக்க, வட்டார வழக்கும் இல்லை, இயல்பாய் வரவேண்டிய நகைச்சுவைக்கு பதிலாய் பத்திரிக்கைகளில் வந்த ஜோக்குகள் என்று ஆங்காங்கே பிண்ணனியில் வரும் காட்சிகள் எழுபதுகளில் வந்த படங்களின் காட்சியமைப்பை நினைவூட்டுகிறது. நிறைய இடங்களில் ஒட்டவில்லை.  கேரக்டர்களில் டெப்த் இல்லாததால் எதையும் உணர்வு பூர்வமாய் பார்க்க முடியவில்லை. நிஜ வாழ்க்கை சம்பவஙக்ள் பல சமயம் மிகவும் போர் அடிக்கும், அதை லைவாக காட்டுகிறேன் என்று நம்மை நுங்கு எடுத்துவிட்டார்கள். க்ளைமாக்ஸில் செத்து போனால் படம் ஹிட்டாகும்னு யாரோ சொல்லியிருப்பாங்க போலருக்கு. ம்ஹூம்ம்ம் … பெட்டர் லக் நெக்ஸ்ட் டைம் ராஜ்மோகன்.

குங்குமபூவும் கொஞ்சும்புறாவும் -  புறா செத்திருச்சு..

Technorati Tags: திரைவிமர்சனம்,குங்குமபூவும் கொஞ்சும்புறாவும்.