Mission Impossible -4

மிஷன் இம்பாஸிபிள் முதல் இரண்டு பாகங்களுக்கு நான் அடிமை. மூன்றாவது பாகம் எனக்கு அவ்வளவாக பிடிக்கவில்லை. ஆனால் அதே நேரத்தில் பார்க்காமல் இருக்க முடியவில்லை என்பதை ஒத்துக் கொண்டுதான் ஆக வேண்டும். அதற்கேற்றார் போல படத்தின் டிரைலர் வேறு என்னை கவர்ந்திழுக்க இதோ மிஷன் இம்பாசிபிள்.

ஏதன்ஹண்ட் தன் குழுவோடு தீவிரவாதி ஹெண்ட்ரிக்கை தேடியலைகிறான். தீவிரவாதி ஹெண்ட்ரிக் ஏதோ மாய்மாலம் செய்து ரஷ்ய நியூக்ளியர் லாஞ்சிங் கோடை திருடி அமெரிக்காவை அழிக்க நினைக்கிறான். ஹெண்ட்ரிக்கை பற்றிய செய்தி கிடைத்து ரஷ்யாவுக்குப் போய் பிடிப்பதற்குள் அவன் கோடை சுட்டு, க்ரெம்ளின் மாளிகைக்கு பாம் வைத்து அதில் ஏதன் ஹண்ட் மாட்டிக் கொள்கிறான். ஐ.எம்.எப்பிற்கு பெயர் கெடும் அளவிற்கு இந்த விஷயம் போனதால் தன் குழுவுடன் தன்மீதும், ஐ.எம்.எப் மீதும் விழுந்த பழியையும், அமெரிக்கா மீதான ஏவுகணை வீச்சையும் எப்படி சமாளிக்கிறான் என்பதுதான் கதை.

கதை என்பது எல்லாம் வெறும் மொக்கை ஜல்லியடிக்கிற விஷயம். இது போல ஆயிரம் கதைகளை பார்த்திருக்கிறோம். படத்தின் ஈர்பே டாம் க்ரூயிஸ்தான். மனுஷன் கமலும், ரஜினியும் சேர்ந்த கலவை. அவரைப் பார்க்கத்தான் இந்த கூட்டம் கூடுகிறது என்று நினைக்கிறேன். வர வர ஆங்கில படங்களில் கூட படு மொக்கையான கதையுடன் வெறும் ஆக்‌ஷன், பில்டப்புகளை மட்டுமே நம்பிக் கொண்டு படமெடுக்க ஆரம்பித்து விடுகிறார்கள். அப்படித்தான் ஆகிவிட்டது இந்தப்படத்தின் கதையும். வெறும் ஹீரோவையும், மிஷன் இம்பாஸிபிள் பெயர் கொடுக்கும் பில்டப்பை மட்டுமே வைத்துக் கொண்டு, படத்தில் வரும் தீவிரவாதியை தேடக்கூட படத்தில் க்ளூ கிடைத்துவிடும் போலிருக்கிறது. ஆனால் இந்த லாஜிக்கென்ற வஸ்துவை எங்கு தேடினாலும் கிடைக்காது போலிருக்கிறது. அவ்வளவு லாஜிக் மீறல்கள். ஆனால் அதையெல்லாம் யோசிக்க முடியாத வகையில் துபாய் புர்ஜ் பில்டிங்கில் எடுக்கப்பட்ட காட்சி உள்ளங்காலில் குறுகுறுக்கிற அளவுக்கு நைல் பைட்டிங் சீன். வாவ்.. என்னதான் சி.ஜி. டெக்னாலஜி பற்றியெல்லாம் தெரிந்தாலும் காட்சி கொடுத்த இம்பாக்டை மறக்க முடியவில்லை.

நாடு நாடாய் சுற்றுகிறார்கள். நம் காதில் பூவையும் சுற்றுகிறார்கள். அனில் கபூர், இந்தியா, சன் நெட்வொர்க் ஆபீஸ் என்று ஏசியன் மற்றும் இந்திய மார்கெட்டையும் குறிவைத்து ஏவி விட்டிருந்த ஐடியா ஒர்க்கவுட் ஆகும் என்று நினைக்கிறேன்.

Mission Impossible – Nothing special.