பகலில் எரியும் விளக்குகள்

மொத்த தமிழ்நாடே மின்வெட்டால் அவதிப்பட்டுக் கொண்டிருப்பது  எல்லோருக்கும் தெரிந்த விஷயமே. அதற்கு நீ காரணம், நான் காரணம் என்று ஆளாளுக்கு கை நீட்டி குற்றம் சாட்டிக் கொண்டிருந்தாலும் கடைசியில் அவதிப்படுவது பொதுமக்கள் தான். சரி அதை விடுங்கள். மின்சாரத்தேவை 3500 மெகாவாட்டுக்கு மேல் இருக்கும் பட்சத்தில் புதியதாய் உற்பத்தி செய்வதை பற்றி யோசிப்பதை விட உபயோகிக்கும் மின்சாரத்தை எப்படி மிச்சப்படுத்துவது என்று சற்றே சிந்தித்தால் எவ்வளவு மின்சாரம் மிச்சமாகும்?. ஆனால் பெரும்பாலான அரசு துறை அலுவலகங்களில் வீணாக ஓடும் ஏஸிக்கள், மற்றும் பேன்களுக்கான மின்சார வீணடிப்பை யாரும் கவனிப்பதேயில்லை. கவர்மெண்ட் காசுதானே என்ற ஒரு அலட்சிய மனப்பான்மை அவர்களிடம் இருப்பதை மறுக்க முடியாது.

அப்படி ஒரு அலட்சியம் நமது மாநகராட்சியிலும் நடக்கிறது. பெரும்பாலான தெருவிளக்குகள் பகல் நேரத்தில் எரிந்து கொண்டேயிருக்கிறது. ஒரு நாள் அல்ல இரண்டு நாள் அல்ல சுமார் ஒரு வாரம் இதை தொடர்ந்து கவனித்துவிட்டு இதை புகைப்படம் எடுத்து அனுப்பியுள்ளா நண்பர் சந்துரு. அவர் ஏரியா என்று இல்லை சென்னையின் பெரும்பாலான இடங்களில் பகல் நேரங்களில் தெருவிளக்கு எரிந்து கொண்டிருக்கிறது. மின்சாரத்தை சிக்கனமாக பயன்படுத்துங்கள் என்று ரேடியோவிலும், டிவியிலும் அறிவிக்கும் முன் மாநகராட்சியின் இம்மாதிரியான மின்சார வீணடிப்பை கவனித்தால் எவ்வளவு நன்றாக இருக்கும்?

கேபிள் சங்கர்